Солонгосын хойгийг Японы колоничлолоос чөлөөлсөн түүхт өдрийг жил бүрийн наймдугаар сарын 15-нд тэмдэглэдэг. Энэ өдөр Өмнөд Солонгост бүх нийтээр амардаг бөгөөд үе үеийн ерөнхийлөгч нар нь хоёр Солонгосыг нэгтгэх үзэл баримтлалыг тодорхойлдог уламжлалтай.

Ерөнхийлөгч Юн Сук Ёл энэ удаад шинэ үзэл баримтлалыг санал болгов. Өмнөх ерөнхийлөгч нар хоёр Солонгосыг нэгтгэхийг онцолдог байсан бол Юн Сук Ёл хойд солонгосчуудын эрх чөлөөг онцолжээ. Тэрбээр Хойд Солонгосын ард түмний оюун санааг өөрчлөх, тэднийг эрх чөлөөнд суурилсан нэгдмэл байдалд хүргэх хэрэгцээг тайлбарлажээ. Энгийнээр хэлбэл, энэ нь Хойд Солонгосын иргэдийн гадаад ертөнцөөс мэдээлэл авах эрх чөлөөг дэмжих явдал ажээ.

Өмнөд Солонгосын засгийн газар Хойд Солонгосын дэглэмийг шүүмжилсэн ухуулах хуудсыг агаарын бөмбөлгөөр дамжуулан хилээр гаргадаг идэвхтнүүдэд чиглэсэн бодлогоо үргэлжлүүлэх юм. Идэвхтнүүдийн олонх нь Хойд Солонгосын дүрвэгсэд байдаг. Юны засгийн газар эдгээр идэвхтэний үйл ажиллагаанд хөндлөнгөөс оролцохоос татгалзаж байна. Тэр бүү хэл энэ үйлдлийг нь үзэл бодлоо илэрхийлэх эрх чөлөөний хүрээнд хамгаалсан гэж Өмнөд Солонгос мэдэгдсэн.

Юн Сук Ёлын мэдэгдэлд Умардын тал хариу өгөөгүй байна. Нэгдэх саналд Хойд Солонгос үргэлж сөрөг хариу үйлдэл үзүүлдэг тул энэ удаад чимээгүй байгаа нь илүү ер бусын хариу үйлдэл аж.

Өмнөд Солонгосын зорилго хоёр талтай. Нэгдүгээрт, гаднаас мэдээлэл авах боломж нь нээгдсэнээр Хойд Солонгосын иргэд өмнөд нутагт амьдрахыг эрмэлзэж, хилээр гарах оролдлого нь нэмэгдэнэ. Хоёрдугаарт, мэдээллийн урсгал нь Умардын ард түмнийг бослогод хүргэж болзошгүй гэж үзэж байна. Ард түмний бослого нь дэглэмд шахалт үзүүлэх магадлалтай ажээ.

Эх сурвалж: THE CONVERSATION