Дэлхийн эмэгтэйчүүдийн чуулга уулзалт өнөөдөр /2024.08.22/ төрийн ордонд үргэлжилж буй. Тус уулзалттай холбоотойгоор Байгаль орчин, уур амьсгалын өөрчлөлтийн сайд  С.Одонтуяагаас зарим асуудлыг тодрууллаа. 

-Танай салбар яамны асуудлын хүрээнд эмэгтэйчүүд чуулж байна. Өнөөдөр ямар, ямар асуудлуудыг онцлон хэлэлцэж байна вэ?

-Олон жилийн дараа өнөөдрийн чуулга уулзалт Монголд болж байна. Ногоон ирээдүйн төлөө гэдэг сэдэв бол дэлхий дахинд тулгамдсан сэдвийн нэг болсон. Байгаль орчны тухай сэдэв бол зөвхөн нэг салбарын асуудал байхаа больж, дэлхийн хөгжлийн асуудал болсон. Манай яамыг Байгаль орчин, уур амьсгалын өөрчлөлтийн яам хэмээн нэрлэсэн нь ч зөв, чухал зүйл. Дэлхийн улс орон бүр уур амьсгалын өөрчлөлт гэж ярьж байна. Нэгдүгээрт, бид уур амьсгалын өөрчлөлтөд хэрхэн дасан зохицсон үндэстэн болох вэ гэдэг чухал асуудал. Нөгөө талаар хүний хүчин зүйлээс хамааралтай асуудлуудад яаралтай ямар ямар арга хэмжээ авах гэдэг. Гуравдугаарт, дэлхий ногоон эдийн засаг руу маш хурдацтай шилжиж байна. Энэ эдийн засаг руу монгол мөн хэрхэн шилжих вэ гэдгийг өнөөдрийн чуулганаар хэлэлцэж байна.

-Монгол Улс ногоон ирээдүй гэж ярихад өнөөдрийн хувьд их хол сонсогдож байгаа байх. Тухайлбал, тэрбум мод, түүхий нүүрснээс татгалзах гэхчлэн олон зүйлс байна шүү дээ. Энэ тухайд та хэрхэн шийдвэрлэх зүйтэй гэж бодож байна?

-Бид өмнө нь зөвхөн нэг зүйлийн үр дагавартай нь тэмцээд байсан. Шалтгаантай нь тэмцдэггүй. Дэлхийн бусад улс орнууд хэлж байгаа. Шууд л ногоон эдийн засаг руу шилжих хэрэгтэй гэж. Ингэснээр алсыг харсан зөв хөрөнгө оруулалт болно. Бид ирэх аравдугаар сард ногоон эдийн засагтай холбоотой үзэсгэлэн гаргахаар ажиллаж байна. Мөн байнгын нээлттэй Showroom гаргахаар төлөвлөж байна. Үүнд банкны үйлчилгээ, эрчим хүчний нар, салхины панелууд гэхчлэн ногоон эдийн засагтай холбоотой мэдээллийг нэгдсэн нэг цэгээс хүргэхээр ажиллаж байна.

Байгаль орчин, уур амьсгалын өөрчлөлтийн яам бодлого л хэрэгжүүлнэ. Бусад ажилд холбогдох байгууллагуудыг дэмжиж ажиллана.

-Монголчууд дотооддоо асуудлаа ярих нэг өөр. Олон улсынхан чуулаад хэлэлцэх өөр. Өнөөдрийн онцлохоор санал санаачилгууд олон гарч байна уу?

-Хүмүүс өөрсдийн гараар байгаль экологио сүйтгэж байгаа тохиолдлууд их гарч байна. Мод тарих ёсгүй газар үр дүн тариалалт хийх гэхчлэн асуудлууд их байна. Бусад улс оронд эмэгтэйчүүд нөхөрлөл байгуулж, байгаль орчноо хамгаалахаар хамтарч ажиллаж байгаа талаар сургалт мөн орсон. Үүнд бид авах, гээхийн ухаанаар хандаж байгаль, экологидоо хайртай байх нь чухал. Өнөөдрийн чуулганаар ч мөн олон санаанууд гарч байна. Тэр бүхнээс хэрэгжүүлэх боломжтой саналуудыг дэмжээд хамтраад явна.