Израилийн арми Лхагва гаригт Ливаны Бекаа хөндийд байрлах Хезболлагийн зэвсгийн агуулахуудыг бөмбөгджээ. Бекаа хөндий нь Хезболлагийн түшиц газар юм. Мөн Ливаны өмнөд хэсэгт орших Сидон хотод Хезболла бүлэглэлтэй хамтран ажиллаж байсан нэгэн зэвсэгт этгээдийг устгажээ. Зэвсэгт этгээд нь Палестины "Fatah" зэвсэгт жигүүрийн гишүүн Халил Хуссейн Халил Аль-Макда байжээ.

Хезболлагийн зэвсгийн агуулахуудыг бөмбөгдөхөд хоёрдогч дэлбэрэлтүүд болсон нь байгууламжид их хэмжээний зэвсэг байсныг илтгэнэ гэж үзсэн. Израилийн Батлан ​​хамгаалахын сайд Йоав Галлант "Ливан дахь зэвсгийн агуулах руу дайрах нь цаашид юу ч тохиолдож магадгүйг илтгэнэ" гэжээ.

Мөн Бекаа хөндийн Баалбек хотын ойролцоох орон сууцны хорооллууд Израилийн агаарын цохилтод өртсөнийг эх сурвалж мэдээлжээ. Агаарын довтолгооны улмаас хоёр хүн амиа алдаж, 19 хүн шархаджээ. Эдгээр нь энгийн иргэн, эсвэл цэрэг байсан нь тодорхойгүй.

Харин Хезболла хариу арга хэмжээ болгож, Израилийн хойд хэсэгт байрлах цэргийн постууд руу нисгэгчгүй онгоцоор халдсан байна. Тэд Израилийн эзэмшилд байсан Голаны өндөрлөг дэх Израилийн цэргийн ложистикийн талбай руу Катюша пуужин харваж, цэргийн постууд руу нисгэгчгүй онгоцоор 22 орчим удаа бууджээ.

Газын зурвас дахь мөргөлдөөн эхэлснээс хойш Ливанд 600 гаруй хүн амиа алдсаны 400 гаруй нь Хезболлагийн дайчин, 132 нь энгийн иргэн байжээ.

Эх сурвалж: REUTERS