Хятадын Төрийн зөвлөлийн ерөнхий сайд Ли Цян дөрвөн өдрийн хугацаатай Орос болон Беларусьт айлчилж байна. Ши Жиньпиний дараа орох Хятадын №2 дипломат гэгддэг Ли Цян ерөнхийлөгч Путин, ерөнхий сайд Михаил Мишустин нартай хоёр улсын хамтын ажиллагаа, стратегийн харилцаа холбооны талаар хэлэлцэнэ.

Энэ нь Хятадын тал ОХУ-ын ерөнхий сайдтай жил бүр уулздаг тогтмол айлчлал юм. Өөрөөр хэлбэл, Ли, Мишустин нарын уулзалт нь 1996 оноос хойш жил бүр зохион байгуулагдаж буй хэлэлцээний нэг хэсэг бөгөөд Ши Жиньпин, Путин нарын тогтоосон чиглэлд бодит хамтын ажиллагааг хэрэгжүүлэх арга хэрэгсэл болдог.

Хятад, Оросын худалдаа өнгөрсөн онд дээд амжилт тогтоож, төлөвлөсөн хугацаанаасаа өмнө 240 тэрбум ам.долларт хүрчээ. Украиныг эзлэн түрэмгийлсний дараа олон улсын томоохон хориг арга хэмжээнд өртсөнөөр Орос улс Хятадын зах зээл, бараа бүтээгдэхүүн, хөрөнгө оруулалтаас асар их хамааралтай болсон. Хоёр талын худалдаа өнгөрсөн онд 2022 оноос 25 хувиар өссөн. Гэхдээ энэ оны эхний долоон сарын байдлаар өнгөрсөн оны мөн үеийнхээс ердөө 1.6 хувиар өсчээ.

Беларусьт Ли Цян тус улсын ерөнхий сайд Роман Головченкотой уулзаж, хоёр орны харилцаа, олон салбарын хамтын ажиллагааны талаар санал бодлоо солилцоно.

Эх сурвалж: CNN