АНУ-ын ерөнхийлөгчийн сонгуульд нэр дэвшигчдийн ширүүн өрсөлдөөн үргэлжилсээр байна. Бүгд найрамдах нам Камала Харрисыг сулруулахын тулд улаан мах, хийн зуух зэрэгтэй холбоотой ташаал мэдээлэл тарааж буйг “France24” агентлаг мэдээлжээ.

Миннесота мужид долдугаар сарын 27-нд болсон жагсаалын үеэр Трамп хэлэхдээ “Камала уур амьсгалын өөрчлөлттэй тэмцэхийн тулд улаан махны хэрэглээг багасгахыг уриалж байна. Ардчилсан намын нэр дэвшигч үхэрнүүдээс ангижирна гэнэ. Яваандаа тэд хүний араас хөөцөлдөх болно” гэжээ. Камала өнгөрсөн онд Цагаан ордонд болсон хэвлэлийн бага хурлын үеэр уур амьсгалын өөрчлөлтийн сэдвийг хөндсөнөөс хойш “хүн амын тоог цөөлөх хуйвалдааны онол” гэх зүйл яригдах болсон юм.

Харин Трампийн хамтрагч Ж.Д.Вэнс наймдугаар сарын 3-нд Атланта хотод үг хэлэхдээ “Харрис таны хийн зуухыг булааж авахыг хүсч байна. Тэр бүү хэл мах идэх боломжийг чинь хүртэл булааж авахыг хүсч байна” гэжээ.

Уур амьсгалын өөрчлөлттэй холбоотой дээрх мэдэгдлүүд “Х” платформд ихээхэн газар авсан боловч үнэн хэрэгтээ Харрис сонгуулийн кампанит ажлаараа ийм амлалт өгөөгүй аж. Харрисийн хэвлэлийн төлөөлөгч Лорен Хитт дээрх мэдэгдлүүдэд тодорхой хариулт өгөөгүй ч “Ардчилсан нам цэвэр агаар, цэвэр ус, хямд, найдвартай эрчим хүчтэй ирээдүйд анхаарлаа төвлөрүүлж байна” гэжээ.

Ерөнхийлөгч асан Дональд Трампийн хувьд уур амьсгалын өөрчлөлтийн аюулыг удаа дараа үгүйсгэж байсан. Тэрбээр “Хамгийн том аюул бол дэлхийн дулаарал биш. Далай ирэх 400 жилийн хугацаанд гурван мм-ээр л өсөх болно” гэж хэлжээ.

Эх сурвалж: FRANCE 24