Олон 10 жилийн өмнө Хойд Солонгост хулгайлагдсан япончуудын төлөөлөл болох Мэгүми Ёкатагийн ээж охинтойгоо уулзах хүсэлтээ сурталчилгааны самбараар дамжуулан илэрхийлж байна. Охины ээж 88 настай Сакиэ Ёката Токио орчмын дижитал сурталчилгааны самбаруудад уг хүсэлтээ байршуулжээ.

Токио, Шинжүкү, Икэбүкүро, Ёкохамагийн галт тэрэгний буудлуудын сурталчилгааны самбараар уг 15 секундын видео бичлэг гарна. Ёкатагийн гэр бүлийн зураг болон ээжийнх нь зурвас бүхий бичлэг наймдугаар сарын 5-наас есдүгээр сарын 1-нийг хүртэл зургаан минут тутамд тогтмол гарах аж.

Гэрэл зурагт Мэгүми Ёкатагийн аав, ээж, хоёр эрэгтэй дүү гэсэн дөрвөн хүн харагдана. Тэдний аав Шигэрү Ёката нь 2020 онд нас баржээ.

Зургийн араас “Амьд байгаа дээрээ Мэгүмитэй уулзахыг минь зөвшөөрөөч. Амьд дээрээ Мэгүмиг аюулгүй байгааг л баталгаажуулж авмаар байна. Ганцхан удаа харахад хангалттай” гэсэн бичиг гарч ирнэ. Ийнхүү цахим самбар ашиглахдаа “Хойд Солонгос”, “хулгайлах” гэх мэт шууд илэрхийллээс зайлсхийсэн аж.

Мэгүми Ёката 1977 онд 13 настайдаа Ниигата мужаас хулгайлагдсан. Хойд Солонгост 1970-1980-аад оны хооронд хулгайлагдсан 17 хүний жагсаалтыг Японы засгийн газар гаргахад Мэгүми багтсан байдаг. Тэднээс тав нь 2002 онд эх орондоо буцаж ирсэн. Үлдсэн хүмүүсийг авчрах ажлыг Япон эрчимжүүлэхийг хичээж буй ч ахиц дэвшил муутай байна.

Эх сурвалж: KYODO NEWS