Мадонна залуу уран бүтээлчдийн жүжгийг санхүүжүүлэх болсон талаараа 66 насны төрсөн өдрөө тэмдэглэх үедээ зарлажээ. Тэрбээр Помпей хотод төрсөн өдрөө хийхдээ Помпейн археологийн цэцэрлэгт хүрээлэнгийн дөрвөн жилийн турш бэлдсэн "Согно ди Воларе" буюу "Нисэх мөрөөдөл" жүжгийн залуу уран бүтээлчидтэй уулзсан юм. Тус жүжиг нь эртний Грекийн хошин жүжгийн эцэг гэгдэх Аристофаны бүтээл билээ.

Мадонна жилд 275 мянган ам.долларын хөрөнгө оруулах болсон байна.

Ингэснээр залуу уран бүтээлчид Помпей хотын амфитеатр болох Театр Грандегаас эхлээд Италийн бусад театруудаар аялан тоглолт хийж, Аристофаны бүтээлийг олон нийтэд таниулах боломжтой болжээ. Помпейн археологийн цэцэрлэгт хүрээлэнгийн захирал Габриэль Зухтригел хэлэхдээ "Мадоннагийн өгөөмөр сэтгэл гаргаж, дэмжсэн энэхүү жүжиг нь Помпей хотын хувьд стратегийн ач холбогдолтой. Энэ жүжиг бол ээдрээт ертөнцөд амьдардаг залуу хүмүүст чиглэсэн бүтээл юм" гэжээ. Мөн жүжигт тоглож буй залуу уран бүтээлчдийн ихэнх нь сургууль завсардсан, ажилгүйдлийн түвшин өндөр байдаг өмнөд хэсгийн ядуу хотуудад амьдардаг гэдгийг онцолсон байна. Мадоннагийн санхүүжүүлсэн жүжиг 2025 оны тавдугаар сард Помпей хотын Гранд театрын тайзнаа тавигдана.

Эх сурвалж: ASSOCIATED PRESS