“Парис-2024” Паралимпийн 15 дугаар наадам энэ сарын 28-нд эхэлнэ. Уг наадамд 203 улсын 4400 гаруй тамирчид спортын 22 төрлөөр медалийн төлөө өрсөлдөх аж. Харин Монгол Улсаас зургаан төрөлд 12 тамирчин өрсөлдөхөөр болжээ.  Монголоос Паралимпид жүдо, байт харваа, таеквондо, пауэрлифтинг, хөнгөн атлетик, усанд сэлэлтийн төрөлд оролцох юм. Тэгвэл өнөөдөр /2024.08.18/-нд Монголын таеквондогийн үндэсний шигшээ багийн тамирчид болох МУГТ Г.Болор-Эрдэнэ, ОУХМ У.Сүрэнжав нар дасгалжуулагчдын хамт Парис хотыг зорьжээ.

Гавьяат тамирчин Г.Болор-Эрдэнийн хувьд паралимпийн наадамд хоёр дахиа оролцох гэж байна. Харин У.Сүрэнжав нь ДАШТ-ий хүрэл, “Ханжоу-2022” Азийн наадмын мөнгөн медальтай ба паралимпын наадамд анх удаа оролцохоор болжээ.

Паралимпийн наадам нь 1988 оноос эхлэн зохион байгуулагдаж буй. Монгол Улсын хувьд 2000 оноос хойш оролцож байгаа бөгөөд Паралимпийн наадмын хамгийн анхны медалийг хөдөлмөрийн баатар, гавьяат тамирчин Д.Баатаржав 2008 онд авч байжээ. Түүнээс хойш хөдөлмөрийн баатар, гавьяат тамирчин Э.Содномпилжээ, гавьяат тамирчин Б.Ууганхүү нар паралимпээс медаль хүртсэн байдаг. Монгол Улс "Токио-2020" паралимпийн наадмаас нэг алтан медаль хүртсэн ба шагналт тав, долдугаар байрт таван тамирчин орсноор 106 орноос 57 дугаар байрт жагссан юм.