Туркийн сөрөг хүчний гишүүн Жан Аталайн халдашгүй эрхийг сэргээх эсэх асуудлаар Баасан гаригт тус улсын парламент хуралдсан. Жан Аталай нь 2022 онд улс төрийн хэргээр 18 жилийн хорих ял сонссон бөгөөд 2023 оны бүх нийтийн сонгуульд шоронгоос оролцож, Хатай мужид ялалт байгуулсан аж. Тиймээс түүний халдашгүй эрхийг сэргээж, засгийн газрын гишүүний хувьд улсын бодлогод гар бие оролцох ёстой гэсэн саналыг сөрөг хүчний Ажилчдын намын гишүүд гаргасан. Гэсэн хэдий ч Аталайд халдашгүй эрх олгох саналыг бусад парламентын гишүүд эсэргүүцсэн байна.

Эрх баригч Шударга ёс, хөгжлийн намын (AKP) гишүүн Алпай Озалан Аталайг " хорлон сүйтгэгч" гэж тодорхойлон, сөрөг хүчний Туркийн зүүний ажилчны намын (TIP) гишүүн Ахмет Шыкд хандаж дургүйцлээ илэрхийлснээс маргаан дэгджээ.

Дараа нь зодоон болж,  Ард Түмний Бүгд Найрамдах намын нэг гишүүн, Ардын Тэгш Эрх, Ардчилал намын нэг гишүүн тархиндаа гэмтэл авсан байна. Зодоон 30 орчим минут үргэлжилсэн бөгөөд гурван гишүүн хүнд бэртэл авсан тул чуулган завсарлахаас өөр аргагүйд хүрсэн. Мөн маргаан гаргасан хоёр гишүүний чуулганд оролцох эрхийг түдгэлзүүлж, Жан Аталайн халдашгүй эрхийг сэргээхгүй гэж сөрөг хүчнээс бусад бүх намын гишүүд санал нэгдсэн байна.

Ялтан хүн парламентын гишүүн болсон тул ерөнхийлөгч Эрдагоны Эрх баригч Шударга ёс, хөгжлийн нам (AKP) олонх болдог парламент Аталайн халдашгүй эрхийг цуцлах шийдвэр гаргасан байдаг. Дараа нь наймдугаар сарын 1-нд үндсэн хуулийн шүүх энэ шийдвэрийг  хүчингүйд тооцжээ. Үүний дараа сөрөг хүчнийхэн Аталайн халдашгүй статусыг сэргээхийг оролдсон нь ийнхүү маргаанаар өндөрлөв.

Эх сурвалж: GUARDIAN