АНУ-ын дэд ерөнхийлөгч Камала Харрис  ерөнхийлөгчийн сонгуульд нэр дэвшихээ зарлаад удаагүй байна. Тэрбээр Баасан гаригт татварын хөнгөлөлт үзүүлэх, зардлыг бууруулах зорилгоор хэрэгжүүлэх хэд хэдэн арга хэмжээг танилцууллаа. Үүнд, хүнсний үнийн өсөлтийг хориглох, анх удаа орон сууц худалдан авч буй зарим хүнд урьдчилгаа төлбөрөө төлөхөд нь туслах зорилгоор 25 мянган ам.доллар бэлнээр олгох, хүүхдийн татварын хөнгөлөлтийг өргөжүүлэх, жороор олгодог эмийн үнийг бууруулах зэрэг багтаж байна.

Кампанит ажлаараа Дональд Трампаас эрс ялгарахыг эрмэлзэж буй Харрис нэр дэвшсэнээсээ хойш анх удаа бодлогод анхаарлаа хандуулсан илтгэл тавьсан нь энэ юм.

АНУ-ын инфляци сүүлийн гурван жил гаруйн хугацаанд байгаагүй доод түвшинд хүрч, гурван хувиас доош буурсныг тус улсын Хөдөлмөрийн яам Лхагва гаригт мэдэгдсэн. Харин хүнсний болон бусад өргөн хэрэглээний барааны үнэ гурван жилийн өмнөхөөс 21 хувиар өндөр байна. Хэрэглэгчдийн итгэлийн судалгаагаар инфляци буурсан ч өндөр үнэ нь худалдан авагчдын, ялангуяа бага орлоготой америкчуудын бухимдлыг төрүүлсээр байна.

Харрис хүнсний салбарыг илүү өрсөлдөх чадвартай болоход тусална гэж амлаж байна. Мөн гэр бүл, дунд болон бага орлоготой хүмүүст чиглэсэн татварын хөнгөлөлт үзүүлэх, эрүүл мэндийн даатгалын шимтгэлийг бууруулахыг уриалж байна.

Орон сууц, түрээсийн үнэ өсч байгааг тэр хүлээн зөвшөөрөөд, бүрэн эрхийн хугацаагаа дуустал гурван сая шинэ хямд үнэтэй орон сууц барих ажлыг идэвхжүүлэхийн тулд зохицуулалтын хүнд суртлыг багасгахыг хичээнэ гэж мэдэгдэв. Тэрбээр түрээсийн төлбөрийг зохиомлоор өндөр тогтоож буй түрээслэгчдэд хариуцлага хүлээлгэх хуулийн төлөө тэмцэнэ гэв.

Үндсэндээ Харрисын төлөвлөгөө нь Байдены засаг захиргааны эдийн засгийн тэргүүлэх чиглэлүүдийн үргэлжлэл боловч ажлын байр бий болгох, дэд бүтцээс гэр бүлийн амьжиргааны өртөг рүү чиглэсэн мэдэгдэхүйц өөрчлөлтийг харуулах ажээ.

Эх сурвалж: GLOBAL NEWS