Японы Сайтама мужид сургуулиас татгалзах зэрэг хүндрэлтэй асуудлыг шийдэхийн тулд хиймэл оюун ухаан ашиглаж байна. Тодруулбал, хиймэл оюун ухаан ашиглан сурагчдын мэдээлэлд дүн шинжилгээ хийж, сэтгэлийн түгшүүр, дээрэлхэлт болон бусад шалтгааны улмаас суралцахаа болих гэж байгаа эсэхийг нь урьдчилан таамаглаж байна. Энэ аргыг ашигласнаар багш нарт суралцахад хүндрэлтэй байгаа сурагчдыг нь илрүүлэх, дэмжихэд туслана гэж үзэж байна.

Японд сүүлийн 10 жилийн хугацаанд бага болон дунд сургуульд 30 хоногоос илүү хугацаагаар хамрагдаагүй хүүхдүүдийн тоо тогтмол өсч байгаа аж. 2022 оны санхүүгийн жилд энэ тоо 300 мянга хүрч дээд амжилт тогтоожээ.

Хиймэл оюун ухаанд суурилсан урьдчилан таамаглах систем нь оюутнуудын ирц, сурлагын амжилт, эрүүл мэндийн байдал зэрэг мэдээллийг үнэлдэг. Мөн сургуулийн эмч сувилагчтай уулзсан эсэх, дээрэлхэлтэд өртсөн эсэх зэрэг мэдээллийг ч үнэлнэ. Дараа нь хичээлдээ явахаа больсон өмнөх оюутнуудын мэдээлэлд үндэслэн хиймэл оюун ухаан таамаглал дэвшүүлнэ.

Тухайн сурагч хичээл сургуулиа хаях гэж байгаа эсэхийг "улаан", "ягаан", "улбар шар", "шар" гэсэн өнгөөр тэмдэглэнэ. "Улаан" нь хичээлээ хаях магадлал хамгийн өндөр, "шар" бол магадлал хамгийн бага гэсэн үг.

18 бага, дунд сургуульд туршилт явуулахад нийт 1193 сурагч эрсдэл өндөртэй байна гэсэн дүгнэлт гарчээ. Тэдний зан байдал болон бусад хүчин зүйлийг харгалзан үзээд 265 нь зайлшгүй тусламж авах шаардлагатай гэж дүгнэжээ.

Мэдээж энэ нь хувийн нууцтай холбоотой учраас тодорхой зохицуулалт ч хийсэн байна. Эцэг эхчүүд хүсвэл энэ төслөөс татгалзаж болно.

Эх сурвалж: KYODO NEWS