Палестины ерөнхийлөгч Махмуд Аббас Газын зурваст айлчилна гэж Пүрэв гаригт мэдэгджээ. Мөн тэрбээр исламын удирдагчдыг өөртэй нь нэгдэхийг уриалсан байна. Тэрбээр Туркийн парламентад үг хэлэхдээ "Би Палестин дахь ах дүү нартайгаа Газа руу явахаар шийдсэн. Төлөөс нь миний амьдрал байсан ч хамаагүй. Миний болон бидний амьдрал Газын зурваст нас барсан хүүхдийн аминаас илүү үнэ цэнтэй байна гэж үгүй" гэжээ.

Махмуд Аббас наймдугаар сарын 13-нд Москвад айлчлаад, тэндээсээ Туркийг зорьсон юм. Туркийн парламентын депутатуудын өмнө тэр 45 минут үргэлжилсэн илтгэл тавьжээ. Тэрбээр Туркийн ард түмэнд дэмжлэг үзүүлсэнд нь талархал илэрхийлэхийн зэрэгцээ Газын зурваст геноцид үйлдэж байна гэж Израилийг буруушаасан байна.

Туркийн ерөнхийлөгч Режеп Тайип Эрдоган Лхагва гаригт Аббастай уулзаж, дайны асуудлаар хэлэлцээ хийжээ. Эрдоган энэ үеэр Палестиныг үргэлжлүүлэн дэмжиж, хүмүүнлэгийн тусламж хүргэх, Израильд үзүүлэх дарамт шахалтыг нэмэгдүүлэх амлалтыг өгсөн байна. Барууны орнууд Хамасыг алан хядах байгууллага гэж нэрлэсэн бол Эрдоган тэднээс ялгаатай нь тус бүлэглэлийг сайшаажээ.

88 настай Махмуд Аббас нь Хамастай удаан хугацааны турш зөрчилдсөн Фатах намын дарга юм. 2006 онд Газын зурваст Хамас болон Фатахын хооронд богино хугацааны зэвсэгт мөргөлдөөн гарч байжээ.

Эх сурвалж: AP