Нийслэлийн Засаг даргын орлогч Л.Хосбаяр, нийслэлийн Эрүүл мэндийн газрын дарга П.Эрхэмбулган нар 18-аас доош насны хүүхдийг суррон унаж, замын хөдөлгөөнд оролцуулахыг хориглох санал гаргасан талаар өнөөдөр /2024.08.16/ мэдээлэл хийлээ.

Нийслэлийн Засаг даргын орлогч Л.Хосбаяр "Сурронтой холбоотой асуудлыг хөндөхөөс өөр аргагүй цаг үе ирсэн байна. Амралт зугаалгын цаг дуусч хичээлийн шинэ жил эхлэх үеэр замын хөдөлгөөний аюулгүй байдал хүүхдийн эрүүл аюулгүй орчинд амьдрах нөхцлийн хөндөх ззйлшгүй шаардлагатай. 2021 оноос хойш “Суррон Улаанбаатар” манай улсад орж ирсэн. Үүнээс хойш жил ирэх тусам тус тээврийн хэрэгслийн хэрэглээ өсч байгаа. Хэрэглэгчдийн тоо өсөхийн хэрээр эрх зүйн зохицуулалт шаардлагатай. Энэ зохицуулалт байхгүй байгаа учраас өсвөр насны хүүхдүүд суррон унаж байхдаа зам тээврийн осолд өртөх, бэртэж гэмтэх, нас барах тохиолдол ихэсч байна. Тиймээс энэхүү эрх зүйн орчныг сайжруулах зорилгоор сурроныг насанд хүрээгүй хүүхдүүд унахгүй байх зохицуулалт хийхээр Хууль зүй дотоод хэргийн сайд болоод, Зам тээврийн яамны сайдад хуулийн өөрчлөлтийн санал, хамтран ажиллах тухай албан бичиг хүргүүлж байна".

Нийслэлийн Эрүүл мэндийн газрын дарга П.Эрхэмбулган "2021 оноос хойш нийслэл хотод өвчлөл, нас баралтын тэргүүлэх шалтгаан дунд осол гэмтэл эхний тавд бичигддэг болсон. Энэ дундаа зам тээврийн осол 10 хувийг эзэлж байна.

Үндэсний статистикийн хорооны мэдээлснээр мотоцикл зэрэг хоёр дугуйтай хэрэгслийн ангилалд 2021 онд 1181 хүн зам тээврийн осолд өртсөн.

Үүнээс 0-18 насны 210 хүүхэд, өөрөө жолоодож явсан 67 хүүхэд, зорчигчоор 143 хүүхэд хохирсон байна. Түүнчлэн энэ тоо 2022, 2023 онуудад өссөн үзүүлэлттэй байна. 2024 оны долдугаар сарын 31-ний байдлаар 1233 тохиолдол бүртгэгдсэн. Үүнээс насанд хүрээгүй хүүхэд 281, өөрөө жолоодож явсан 238 хүүхэд байна. Эдгээр тоонуудаас харахад тус тээврийн хэрэгслийг насанд хүрээгүй хүүхэд унахгүй байх зохицуулалт хийх зайлшгүй шаардлагатай байна" гэв.