Хойд Солонгосын үндэсний баяр болох чөлөөлөх өдрийг тохиолдуулан Оросын ерөнхийлөгч Путин Ким Жон Унд мэндчилгээ дэвшүүлж, захидал илгээжээ. Мөн Путин захидал дээрээ "Орос, Хойд Солонгосын хооронд байгуулсан гэрээг хэрэгжүүлэх нь бүс нутгийн тогтвортой, аюулгүй байдалд хувь нэмэр оруулж байна" гэжээ.

"Солонгосыг чөлөөлөхийн төлөө мөр зэрэгцэн тэмцсэн Улаан армийн дайчид болон Солонгосын эх орончдод хүндэтгэл үзүүлж байна. Хамгийн гол нь тэрхүү аймшигт дайны үед бэхжсэн найрамдал, харилцан туслалцлын холбоо одоо ч өөрчлөгдөөгүй. Энэ нь манай хоёр орны сайн хөршийн харилцааг хөгжүүлэх найдвартай үндэс суурь юм" гэж Хойд Солонгосын “KCNA” агентлаг Путины захидлаас иш татан мэдээлжээ.
Түүнчлэн, захидалд "Пёньянд болсон хэлэлцээний үр дүнд бий болсон тохиролцоог сайтар хэрэгжүүлэх нь Орос, Хойд Солонгосын хамтын ажиллагааг өргөжүүлэхэд тус дөхөм үзүүлнэ гэдэгт итгэлтэй байна. Энэ нь хоёр ард түмний ашиг сонирхолд бүрэн нийцэж байгаа бөгөөд бүс нутгийн тогтвортой, аюулгүй байдлыг хангахад хувь нэмэр оруулна" гэж бичсэн байжээ.
Ерөнхийлөгч В.Путин зургадугаар сарын 19-нд Пёньянд хийсэн айлчлалын үеэр Орос, Хойд Солонгосын иж бүрэн стратегийн түншлэлийн гэрээ, эрүүл мэнд, анагаахын боловсрол, шинжлэх ухааны салбарт хамтран ажиллах гэрээ, Туманая дээгүүр авто замын гүүр барих гэрээнд гарын үсэг тус тус зурсан байдаг.

Эх сурвалж: TASS