Сурагчийн дүрэмт хувцсыг хүүхдийн хөдөлгөөнд нийцтэй байлгах, мөн эцэг эхэд нь санхүүгийн хүндрэл учруулахгүй үүднээс Ерөнхий боловсролын сургуульд поло цамцны сонголтыг нэвтрүүлэх талаар мэдээлэл гарсан. Үүнтэй холбоотойгоор "Сурагчийн поло цамц захиалгаар хийнэ, худалдана" гэх зар цахим орчинд ихээр байрших болжээ. Гэхдээ энэ хичээлийн жил сурагчид хуучин дүрэмт хувцсаа өмсөх юм байна. Сурагчийн дүрэмт хувцас харилцан адилгүй үнэтэй байна. Тодруулбал эцэг, эхчүүдийн хамгийн ихээр худалдан авдаг "Шилмэл загвар" ХХК-ний хувцас ангиасаа хамаараад өөр, өөр байна. 

Бага ангийн эмэгтэй дүрэмт хувцас:

• Сарафан-78.000
• Цэнхэр цамц-35.000
• Зангиа-6000 төгрөгийн үнэтэй багцаараа 119 мянган төгрөг

Бага ангийн эрэгтэй дүрэмт хувцас:

• Хүрэм-78.000
• Өмд-49.000, цамц-35.000
• Зангиа- 6000 төгрөг иж бүрнээрээ 168 мянган төгрөг буюу дотоодын үйлдвэрүүдээс хамгийн үнэтэй нь байна.

Харин дунд ангийн эрэгтэй дүрэмт хувцас иж бүрнээрээ /хүрэм, өмд, цамц, зангиа/ 202 мянган төгрөг бол эмэгтэй дүрэмт хувцас /хүрэм, юпка, цамц, зангиа/ 198 мянган төгрөг, ахлах ангийн дүрэмт хувцас багцаараа эрэгтэй 234 мянга төгрөг, эмэгтэй 277 мянган төгрөгийн үнэтэй байна. "Торгон хийц" ХХК-ний дүрэмт хувцасны үнэ “Шилмэл загвар” үйлдвэрийнхтэй ижил үнэтэй байгаа бол "Батзүү", "Төмөр трейд" зэрэг үйлдвэрүүдийн өмд цамц, хүрэм, юпка тус бүр нь үнэ 2000-11000 төгрөгөөр хямд байна. Багцын үнийн хувьд 20 орчим мянган төгрөгийн зөрүүтэй худалдаж байна.