Америк, орос иргэншилтэй, 33 настай баллетчин Ксения Карелина Украинд 51 ам.доллар хандивласныхаа төлөө бүх насаараа хоригдож магадгүй болсон тухай мэдээлэл энэ оны хоёрдугаар сард гарсан. ОХУ-ын дотоодын тагнуулын гол байгууллага болох Холбооны аюулгүй байдлын алба эмэгтэйг эх орноосоо урвасан хэргээр баривчилсан юм. Тэрбээр дайны эхний өдөр буюу 2022 оны хоёрдугаар сарын 24-нд ойролцоогоор 51 ам.долларыг "Украинтай хамт" гэх ашгийн бус байгууллагын дансанд шилжүүлжээ.

Тэгвэл ОХУ-ын шүүхээс түүнд 12 жилийн хорих ял оноожээ. Түүний хэргийг "Wall Street Journal"-ын сэтгүүлч Эван Гершковичийг шүүсэн шүүгч хянан хэлэлцсэн байна.

Цагаан ордны үндэсний аюулгүй байдлын төлөөлөгч Жон Кирби энэ ялыг харгис хэрцгий гэж нэрлээд, АНУ түүнийг суллахыг шаардана гэж мэдэгджээ. АНУ-ын Төрийн департамент ард иргэдээ ОХУ-д зорчихгүй байхыг үе үе сануулдаг. Уг анхааруулгаа энэ удаад мөн хүчтэй илэрхийлж, одоо ОХУ-д байгаа америк иргэдийг ч нутаг буцахыг зөвлөсөн байна.

Мөн Карелинагийн найз залуу Кристофер ван Херден 12 жилийн ялыг хүлээн зөвшөөрөхгүй байна. Тэрбээр "Түүнийг хилсээр баривчлагдсан гэж зарлахыг АНУ-ын Төрийн департаментад уриалж байна. Түүний эрх чөлөөг эргүүлэн авчрах нь АНУ-ын засгийн газрын тэргүүлэх зорилт. Америкийн нутаг дэвсгэр дээр Америкийн иргэн байхдаа хандивласан 51 ам.долларын хандивын төлөө түүнийг 12 жилийн хорих ял хүлээж байна" гэжээ.

Карелина оны эхээр гэр бүлтэйгээ уулзахаар Орост ирэхдээ баривчлагдсан аж. Найз залуу нь түүнийг гэр бүлийнхэнтэй нь уулзуулахын тулд онгоцны тасалбар авч өгч, гэнэтийн бэлэг барьсан байжээ. Гэвч түүнийг Орост ирсэн даруйд ФСБ-ын хамгаалалтын албаны ажилтнууд байцааж, хотоос гарахыг нь хориглосон байна. Гэр бүл, найз нөхөд нь Карелинаг улс төрд ач холбогдол өгдөггүй нэгэн гэдгийг онцолж, баривчлагдсанд нь цочирдож буйгаа илэрхийлж байв.

Хоёр долоо хоногийн өмнө ОХУ болон барууны орнуудын хооронд томоохон хэмжээний хоригдол солилцоо болоход Ксения Карелинагийн нэр үүнд багтаагүй. Өмгөөлөгч Михаил Мушаилов түүний нэрийг ирээдүйд болох солилцоонд багтаахаар ажиллаж байгаагаа мэдэгджээ.

Эх сурвалж: REUTERS