Төмөр замын тээврийн салбар нь улс орны хөгжилд чухал үүрэгтэйг төр засаг анхаарч, төмөр замын олон төсөл хөтөлбөрийг эрчимтэй хэрэгжүүлэхэд онцгой анхаарч байгаа билээ. Монгол Улсын төмөр замын сүлжээг өргөтгөх, суурь бүтцийг шинэчлэх, хөдлөх бүрэлдэхүүний парк шинэчлэлт хийх зэрэг олон нааштай алхмууд энэ салбарт хийгдэж байна. Манай улсын хөгжилд жинтэй хувь нэмрээ оруулсан, төмөр замын тээврийн салбарын хүндийг 75 жил нуруун дээрээ тээж яваа “Улаанбаатар төмөр зам” ХНН-ийн дүрмийн санг өсгөх замаар тус нийгэмлэгийн хүчин чадлыг нэмэгдүүлэх саналыг манай улсын талаас тавьсныг оросын тал дэмжиж, гол замын 5 шинэ зүтгүүр нийлүүлэхээр тохирсон юм.

Тэдгээр 5 зүтгүүрийг хүлээн авах ёслол Улаанбаатар зүтгүүрийн депод боллоо. Орчин үеийн өндөр хүчин чадалтай 2ТЭ25км серийн эдгээр зүтгүүр нь өмнө нь монголын цаг агаарын хүнд нөхцөлийг даван туулах чадвартайгаа харуулсан юм. Эдгээр шинэ зүтгүүрээр парк шинэчлэлт хийснээр өдөр бүр өсөн нэмэгдэж байгаа тээврийн хэрэгцээг тасралтгүй найдвартай хангах бололцоо нэмэгдэнэ. Өнөөдөр “УБТЗ” ХНН хоног тутам ажиллах зүтгүүрийн тоог 57-д тогтмол барихыг зорьж байгаа бөгөөд эдгээр 5 шинэ зүтгүүр орж ирснээр энэ шаардлага найдвартай хангагдана гэж тооцож байна.

Ийнхүү УБТЗ-ын тээх хүчин чадал нэмэгдсэнээр тээврийн хэмжээ нэмэгдэх бололцоо өсөх юм.