"Мета"-ийн босс, тэрбумтан Марк Зукерберг эхнэр Присцилла Чаны хөшөөг захиалгаар хийлгэсэн нь интернэтээр шуугиан тариад байна. Хөшөөг Нью-Йоркийн барималч Даниел Аршам бүтээжээ. Присцилла Чаны хөшөө 2.1 метр өндөр, харагдах байдал нь "Аватар"-тай төстэй.

Эртний Ромд нас барсан хайртай хүнээ дурсах, хамгийн чухал хүнээ хүндэтгэх зорилгоор хөшөө босгодог байсан. Марк Зукерберг энэ уламжлалаар эхнэрийнхээ хөшөөг захиалж хийлгэсэн гэж инстаграмдаа бичжээ. Харин Присцилла Чан түүнийх нь доор "Би хэдий чинээ олон болно төдий чинээ сайн уу?" гэж бичсэн байв.

Цахим сүлжээнд Марк Зукербергийг "wife guy" гэж нэрлэн хошигноод эхэлжээ. Нийгэмд эзлэх байр сууриа нэмэгдүүлэхийн тулд эхнэрээ ашигладаг эрчүүдийг "wife guy" гэж нэрийддэг. Цахим сүлжээ хөгжсөн орчин цагт эхнэрийнхээ тухай бичиж, нийтлэн нэр хүндээ өсгөдөг эрчүүдийг ингэж нэрлэх нь бас бий. Түүнчлэн "Айлын нөхрүүдийг чичрүүлж байна шүү", "Маркаас уучлалт гуйя, би наад тоглоомыг чинь сайн ойлгохгүй юм байна", "Ёстой тэрбумтан хүний л хийх зүйл байна", "Муухай харагдаж байна" гэх зэрэг сэтгэгдлүүд ч харагдана. Хүмүүст таалагдсан ч бай үгүй ч бай Зукерберг романтик үйлдэлд шинэ стандарт тогтоосон нь дамжиггүй.

Дашрамд дурдахад, Зукерберг, Чан нар 2012 онд гэрлэсэн бөгөөд гурван охинтой.

Эх сурвалж: BBC, EURO NEWS