Өнгөрсөн гуравдугаар сарын 1-ээс эхлэн зургаан сарын хугацаатай Орос шатахууны экспортдоо хориг тавьсан байдаг. Тус улс дотоодын үнийн хөөрөл, зах зээлийн эрсдэлээс сэргийлэн Евразийн эдийн засгийн холбоо (EAEU)-ны орнууд, Монгол, Өмнөд Осети, Гүрж зэрэг улсаас бусад улсад хориг тавьсан. Тэгвэл хориг арга хэмжээн хугацаа дуусч байна.

Оросын дотоодын зах зээл 2022 оны сүүл үетэй харьцуулахад тогтворжсон ч хэд хэдэн буурсан үзүүлэлт ажиглагдлаа.

Эрчим хүч, цэвэр агаар судлалын төв (CREA)-өөс Даваа гаригт /2024.08.12/ нийтэлсэн судалгаанаас харвал өнгөрсөн долдугаар сард Оросын шатахууны экспортын орлого гурван хувиар буурч, өдөрт 722.16 ам.доллар олсон. Энэ нь 2024 оны хамгийн доод үзүүлэлт буюу бага орлого олсон гэсэн үг. Мөн түүхий нефтийн орлого 5 хувиар буурчээ.

Энэ мэтчилэн шатахуун, нефтийн салбар өнгөрсөн сард хамгийн муу үзүүлэлттэй байсан тул Орос ашигтай ажиллах арга зам хайх ёстойг шинжээчид дурдав.

"CREA"-ийн тооцоолсноор Оросын төсөв 2024 оны эхний долоон сарын байдлаар өмнөх оны мөн үетэй харьцуулахад 50 хувиар өссөн. Энэ нь түүхий нефтийн ашигт малтмалын олборлолтын албан татвар(MET) нэмэгдсэнтэй холбоотой юм. Одоогийн байдлаар "MET" тонн тутамд 31,134 рубль буюу баррель тутамд 47 ам.долларын татвар авдаг. Татварын хөнгөлөлттэй нөхцөлд тонн тутамд 20,604 рубль буюу баррель тутамд 31 ам.долларын татвар авч байна.

Нэмж дурдахад, Орос дотоодын болон гадаадын компаниуддаа 20 хувийн татвар ногдуулдаг. Их хэмжээний татвар авдаг ч газрын тосны үйлдвэрлэлийн зардал нь бага. Тиймээс борлуулалтаас олсон орлогын дийлэнх хэсэг нь татвар болж, ашиг буурч байна гэсэн үг юм. Москва татварыг нэмэгдүүлж, Украины түрэмгийлэлдээ зарцуулж байгаа нь эдийн засагт бас нэгэн хүндрэл үүсгэж буй.

Эх сурвалж: ALJAZEERA, CREA