Украины ерөнхийлөгч Зеленский  АНУ-д үйлдвэрлэсэн “F-16” сөнөөгч онгоцыг эх орондоо авчирснаа зарласан. Тус онгоц нь  Оросын эсрэг байлдах хүчин чармайлтыг нэмэгдүүлнэ гэж барууны болон Европын холбоо найдаж буйгаа илэрхийлжээ. Украин одоогийн байдлаар арван "F-16" онгоцтой болсон.  Зеленский "Бид үүнийг хийж чадсан. Эдгээр тийрэлтэт онгоцнуудыг эзэмшиж, эх орондоо аль хэдийн ашиглаж эхэлсэн бүх залуусаараа би бахархаж байна" гэжээ. Украин дайн эхэлснээс хойш тийрэлтэт сөнөөгч онгоцтой болгохыг барууны орнуудаас хүсч байсан билээ. Үүний нэг нь "F-16" бөгөөд олон удаагийн уулзалт, хэлэлцээрийн дараа Зеленский "хүссэн зүйл"-ээ авч чаджээ.

"ТЭМЦЭГЧИД ТУСАЛНА"

Их Британийн бизнесийн сэтгүүл "The Economist" мэдээлснээр эхний 10 "F-16" онгоц Украинд долдугаар сарын 31-нд ирсэн байна. Тус онгоцнууд "NATO"-гийн тактикийн мэдээллийн холбоос болох "Link-16"-аар тоноглогдсон. Энэ нь операторт мэдээлэл хурдан шуурхай дамжуулна гэсэн үг юм. Уг сэтгүүл мөн баруунаас ирсэн онгоцны тоо цөөн байгаа ч "F-16" онгоцнууд Украин цэргүүдийн урам зоригийг нэмэгдүүлэхэд туслах болно гэж мэдээлсэн байна. Украин улс агаарын довтолгооноос хамгаалах системдээ "F-16" онгоцыг нэгтгэхээс гадна ашиглалтын туршлага хуримтлуулахад цаг хугацаа хэрэгтэй гэж шинжээчид үзэж буй.

АНУ-ЫН ШААРДЛАГА

Оросын армийн агаарын дайралтаас сэргийлэхийн тулд "F-16" сөнөөгч онгоц зайлшгүй шаардлагатай гэдгийг Киев онцолж ирсэн. Байдены засаг захиргаа эхэндээ байлдааны онгоцнуудыг зөвшөөрөөгүй бөгөөд үүнд цаг хугацаа шаардагдана гэсэн аж. Тухайн үед Байден Украинд сөнөөгч онгоц биш танк, их буу, агаарын довтолгооноос хамгаалах зэвсэг хэрэгтэй гэж хэлж байсан.

Одоогийн байдлаар Нидерланд 24, Дани 19, Норвеги зургаа, Бельги 30 (2028 он гэхэд) онгоц өгөхөө амлаад байна.

Украины нисгэгчдийн сургалт өнгөрсөн зунаас эхлэн Дани, АНУ болон бусад оронд явагдаж байна. Орос Украины эсрэг өдөр бүр 300 орчим тийрэлтэт онгоц байрлуулж байгааг Зеленский долдугаар сард онцлон хэлж, Киев улс орноо хамгаалахын тулд 128 "F-16" байлдааны онгоц хэрэгтэй гэжээ.

Гэвч Оросын цэргийн довтолгоо сунжирсан ч гэсэн Украин "F-16"-уудыг авна гэдгээ илэрхийлжээ.

Өнгөрсөн оны тавдугаар сард Хирошимагийн долоон бүлгийн дээд хэмжээний уулзалтын үеэр Байден Украинд "F-16" онгоц нийлүүлэхийг зөвшөөрч, нисгэгчдийг сургана гэж мэдэгдсэн. Оросын армийн агаарын дайралтаас сэргийлэхийн тулд "F-16" сөнөөгч онгоц зайлшгүй шаардлагатай гэдгийг Киев тухайн үед мөн адил онцолж байв.

"F-16" ТАКТИКИЙН НӨЛӨӨ

АНУ-ын нэгэн судалгааны төв өнгөрсөн зургадугаар сард Украин "F-16" онгоцнуудыг авсан явдал нь дайнд хэрхэн нөлөөлөх талаар дүн шинжилгээ хийжээ. Стратегийн болон олон улсын судалгааны төвийн тайланд "F-16" онгоцнууд ихээхэн нөлөө үзүүлж, Украинд "дайн болон хэлэлцээрийн ширээний ард илүү хүчтэй болох" боломжийг олгосон гэж тэмдэглэжээ.

"F-16" онгоцнууд нь нисдэг тэрэг, агаарын довтолгоо зэрэг Оросын түрэмгийллийг тасалдуулж чадна гэж судалгааны байгууллага мэдэгдсэн.  Мөн Харьковын эргэн тойронд Оросын алсын зайн гулсах бөмбөгний тактикт саад болно гэж үзэж байна. Мөн тайланд "F-16" онгоцнууд Украины нутаг дэвсгэрт нисгэгчгүй онгоц, пуужинг илрүүлэх, устгахад үр дүнтэй байж, тус улсын батлан ​​хамгаалах чадавхыг нэмэгдүүлнэ гэжээ. Эдгээр тийрэлтэт онгоцнууд Хар тэнгис дэх Оросын флотын үр нөлөөг бууруулж мөн болзошгүй.

Эх сурвалж: NHK