Энэ сарын 6-ны өдөр, цахилгаан дугуйтай замын хөдөлгөөнд оролцож байсан хүүхэд дугуйгаа цоройлгож явж байгаад машинд мөргүүлж шидэгдсэн бичлэг цахим сүлжээнд явсан. Иргэдийн дийлэнх нь хүүхдийг буруутгасан сэтгэгдэл бичжээ. Тэгвэл өчигдөр мөн л цахим сүлжээнд, сурронтой зургаан хүүхэд гэрлэн дохион дээр зогсож буй зургийг иргэн нийтэлж, жолооны үнэмлэхээр унуулдаг болгооч ээ! запаас амь байхгүй шүү дээ гэжээ.

Сүүлийн жилүүдэд хүүхдүүд суррон буюу цахилгаан дугуйг их унах болсон. Замын хөдөлгөөнд оролцохдоо хурдтай явдаг, тээврийн хэрэгслийн голоор сүлжиж давхидаг. Энэ нь эргээд өөрийнх нь болон өрөөлийн эрүүл мэнд, эд хөрөнгөд цаашлаад амь насанд нь заналхийлж байгаа хэрэг. Монгол Улсад энэ төрлийн тээврийн хэрэгсэл зорчих зориулалтын зам тун ховор. Мөн яг тус тээврийн хэрэгсэлд зориулсан зохицуулалт байхгүй. Замын хөдөлгөөний дүрэмд, энгийн загварын цагт 50 км хурдалдаг цахилгаан дугуйг 16 нас хүрсэн бол жолоодох эрхийн үнэмлэхгүй замын хөдөлгөөнд оролцож болно. Ингэхдээ тээврийн хэрэгслийн баруун гар талд, тээврийн хэрэгсэлд саад болохгүй явна гэж заасан байдаг. Тийм учраас хүүхдүүд унах нь нэмэгдсээр буй.

Түүнчлэн цахилгаан дугуйнд толь, гэрлэн дохио байхгүй тул араас ирж байгаа машин харагдахгүй бас эгнээ байр солиход бусад тээврийн хэрэгслийн байршлыг мэдэх боломжгүй зэрэг томоохон асуудал тулгарч байгаа юм. Нэг үгээр хэлбэл, замын хөдөлгөөний дүрэм мэдэхгүй хүн зориулалтын бус хэрэгслээр замын хөдөлгөөнд оролцож байна.

Үүнээс үүдэж замын хөдөлгөөнд оролцож байхдаа унаж бэртсэн тохиолдол жил ирэх тусам нэмэгдэж байгааг Гэмтэл согог судлалын үндэсний төв болон, Тээврийн цагдаагийн албанаас мэдээлдэг. 2019, 2020 оноос хойш цахилгаан дугуйг сонгон хэрэглэх хүүхэд залуучуудын тоо нэмэгдсээр өнгөрсөн жилээс эрс нэмэгдэх хандлага ажиглагдаж байгаа юм. Тиймээс уг тээврийн хэрэгсэлд хууль дүрэм шаардлагатай байна. Энэ тухай хүмүүс их ярих болсон гэвч холбогдох мэргэжилтнүүд нь анхаарч ярьж байгаа зүйл алга. Хүүхдүүд, түгжирч байхаар цахилгаан дугуйтайгаа явбал цаг хэмнээд хурдан амар гэдэг. Тун удахгүй сургууль цэцэрлэгийн үйл ажиллагаа эхлэхээр түгжрэл ихэснэ. Энэ үед цахилгаан дугуйны хэрэглээ улам л нэмэгдэх байх. Тиймээс эцэг эхчүүд хүүхдэдээ аль болох цахилгаан дугуй авч өгөхгүй байх, замын хөдөлгөөнд оролцохдоо хурдаа тохируулж, хуульд заасан дүрмийн дагуу зорчих хэсгийн баруун гар талаар зорчиж, хамгаалах хувцас хэрэглэл өмсөж байхыг сануулъя!