Улаанбаатар хотод нэмж барилга барих газар үлдээгүй учраас хотын захиргаанаас сүүлийн үед эрчимтэй авч хэрэгжүүлж буй ажлын нэг нь гэр хорооллыг орон сууцжуулах хөтөлбөр. Ингэхийн тулд газар чөлөөлөх, гэр хорооллын айл өрхүүдэд нөхөн төлбөр олгох ажлыг энэ жил эрчимжүүлж буй. Энэ хүрээнд гэр хорооллын зургаан дэд төв байгуулна гэж хотын захиргаанаас мэдээлсэн. Үүний нэг нь өнөөдөр хэл ам дагуулаад буй "Сэлбэ дэд төв" төсөл. 2024 оны гуравдугаар сарын 6-ны өдрийн Засгийн газрын хуралдаанаар газар чөлөөлтийн тухай журам дэмжигдэн, гуравдугаар сарын 18-наас "Сэлбэ дэд төв"-ийн иргэдтэй ажиллах, ажлын хэсэг үйл ажиллагаагаа эхлүүлсэн.

"Сэлбэ дэд төв" төсөлд Сүхбаатар дүүргийн 13, 14 дүгээр хороо, Чингэлтэй дүүргийн 14, 18 дугаар хороо буюу Хайлааст, Таванбуудал, Зургаанбуудал орчмын нутаг дэвсгэрийг хамаарна.

Тус бүтээн байгуулалтын хүрээнд нийт 156 га газрыг чөлөөлөх шаардлагатай. "Сэлбэ дэд төв"-ийг орон сууцжуулах төслийн газар чөлөөлөлт 76 хувьтай үргэлжилж байгаа талаар хотын шинэ архитектор хэлэв. Тэрбээр “Нийслэлийн хэмжээнд таван дэд төвийг тодорхойлсон бөгөөд түүний нэг нь Сэлбэ дэд төв юм. Дэд төвийг байгуулснаар хотын төвлөрөл саарч, эдийн засгийн урсгалыг дэд төв рүү оруулснаар түгжрэл буурна”гэжээ. Угтаа энэ орчмын айл өрхүүдийг газраа чөлөөлж, орон сууцны хөтөлбөрт хамруулах ажил эхлээд цөөнгүй жил болсон. Ялангуяа 2024 оны УИХ-ын сонгуулийн өмнө түүхэндээ хамгийн эрчимтэй ажилласан гэж хэлж болно. Гэвч хотын ерөнхий архитектор ажлаа хүлээн авснаар энэхүү төслийн төлөвлөлтийг “20 минутын хот” зарчмыг баримталж хийхээр болсон гэнэ. Ингэснээр түгжрэлийн асуудлыг тодорхой хэмжээнд шийдэж чадна гэж үзэж буй. Гэвч хотын түгжрэлтэй бүсийн тоонд зүй ёсоор тооцогдох, Хайлааст, долоон буудал чиглэлд "20 минутын хот" байгуулна гэдэг юу л бол. Харин агаарын бохирдлыг бууруулах хүрээнд гэр хорооллыг орон сууцжуулах ажлаа нэн түрүүнд хийх хэрэгтэй байна. Хэдий газар чөлөөлөлтийн ажил үргэлжилж байгаа ч оршин суугчдын хувьд газраа чөлөөлсний дараа барилга хурдан хугацаанд баригдаж, ашиглалтад орох эсэх дээр эргэлзэж байгаа нь лавтай. 

ГАЗРЫН ҮНЭЛГЭЭ 170-380 МЯНГАН ТӨГРӨГ БАЙНА

Иргэдийн газрыг яг хэдэн төгрөгөөр үнэлж авч байгаа талаар нийслэлийн Газар зохион байгуулалтын албаны Газар чөлөөлөлтийн хэлтсийн дарга н.Мөнхбаяраас тодруулахад "Газрын 1 м.кв-ийн үнэлгээг гурван янзаар гаргасан. Төв зам дагуух газрыг нэг м.кв-ыг 380 мянга, дараагийн түвшний байршилд 240 мянга, өндөрлөг хэсэгт байгаа айлын газрыг 1 м.кв-ыг нь 175 мянга гэсэн үнэлгээг мэргэжлийн байгууллагын ажилтнууд тогтоосон" гэв.

Тодруулбал, дээрх бүсэд амьдардаг иргэн 700 м2 газартай гэж бодоход нэг м.кв-ыг 380 мянган төгрөгөөр үнэлүүлэхэд 260 сая төгрөг болж буй. Иргэн энэхүү мөнгөө бэлнээр авч болно, аль эсвэл хашааны газраа орон сууцаар сольж болно. Харин орон сууц ашиглалтад орох хүртэл амьдрах байрных нь түрээсийн төлбөрийг нийслэлээс даах гэрээтэйгээр талууд харилцан тохиролцох боломжтой байгаа юм.

Үнэлгээг зөвшөөрч гэрээ байгуулсан 259 иргэний нөхөн олговорт шаардлагатай 44.7 тэрбум төгрөгийг Улаанбаатар хотын хөрөнгөөс гаргах нийслэлийн Засаг даргын захирамж гарчээ.

Уг захирамжийн дагуу эхний ээлжид гэрээ байгуулсан 259 иргэний нөхөх олговрын мөнгийг зургадугаар сараас данс руу нь шилжүүлж эхэлсэн. Дараагийн ээлжийн 228 иргэний 42.5 тэрбум төгрөгийн нөхөх олговор олгох захирамжийн төсөл нийслэлийн Засаг даргын Тамгын газарт хянагдаж байгаа гэнэ. "Сэлбэ дэд төв"-ийн айлуудын газрыг чөлөөлснөөр эхний ээлжид 12 мянган айлын орон сууцыг барих боломж бүрдэнэ гэдгийг албаныхан мэдээлж буй. Бид энэ талаар эргэн мэдээлэх болно.

"Сэлбэ дэд төв"-ийн бүтээн байгуулалтууд:

• 6.7 км авто зам
• 5.3 км  цахилгаан холбоо
• 9.97 км дулаан хангажм
• 19.78 км ус хангамж, ариутгах татуурга
• 2.4 км  үерийн хамгаалалтын далан суваг зэрэг бүтээн байгуулалт хийнэ.

Нийслэлээс гэр хорооллыг барилгажуулах дэд төвүүд:

• Баянхошуу дэд төв
• Сэлбэ дэд төв
• Дамбадаржаа дэд төв
• Дэнжийн мянга дэд төв
• Толгойт дэд төв
• Шар хад дэд төв