Ираны дэд ерөнхийлөгч Мохаммед Жавад Зариф албан тушаалд томилогдоод ердөө 11 хоног ажилласныхаа дараа огцров. Тэрбээр "Би ажилдаа сэтгэл хангалуун бус байна. Хүмүүсийн хүлээлтийг биелүүлж чадаагүйдээ харамсаж байна" гэж Ням гаригт жиргэжээ. Түүний ажлаа өгсөн шалтгаан нь шинэ газрын сайд нарын томилгоотой холбоотой аж. Ерөнхийлөгч Масуд Пезешкяний томилсон 19 сайдын дор хаяж долоо нь Зарифын сонголт байгаагүй.

Зариф огцорсон нь шинэ ерөнхийлөгчийн хувьд хоёр дахь хямрал болж байна. Хамас бүлгийн удирдагч Исмаил Хание саяхан алагдсан нь Пезешкяний хувьд томоохон сорилт болсон юм.

Зариф нь ерөнхийлөгчийн сонгуулийн кампанит ажлын үеэр Пезешкяний баруун гар байж, түүнийг ялалт байгуулахад гол үүрэг гүйцэтгэжээ. Мөн тэрбээр Пезешкяний гадаад бодлогын шинэ чиглэлийг хэрэгжүүлэхэд туслах гол хүмүүсийн нэг байсан. Зариф 2013-2021 оны хооронд Ираны ахлах дипломатч байсан. Мөн 2015 онд Ираны хэлэлцээний багийн ахлагчийн хувиар дэлхийн зургаан гүрэнтэй олон улсын цөмийн хэлэлцээр байгуулж чадсан юм. Түүний тусламжтайгаар Ираны эдийн засгийг саатуулж буй хориг арга хэмжээг цуцлахын тулд цөмийн хэлэлцээрийг сэргээнэ гэж Пезешкян найдаж байжээ.

Сонгуулийн дараа Зариф тэргүүтэй хэсэг албан тушаалтан засгийн газрын албан тушаалд нэр дэвшигчдийн жагсаалтыг гаргах ёстой байв. Улмаар Пезешкян Ням гаригт томилгоог танилцуулсан боловч Зарифын хүссэнээр зарим сайдыг томилоогүй. Ажиглагчдын таамаглаж буйгаар Ираны хуучинсаг үзэлтэй фракц зарим сайд нарыг Пезешкянд тулгасан байна.

Эх сурвалж: DPA INTERNATIONAL