Япон улс уламжлалт өв соёлоо шингээсэн футуристик элементүүдээрээ алдартай. Уламжлал болон орчин үеийн хэв маягийг хамтад нь мэдэрч болох нэгэн шинэ газар Токиод нээгджээ. Энэ бол Шинжүкүгийн Нинжа шоу.

Тус шоу 90 минут үргэлжлэх ба "TryHard Japan" энтертайнмент компани болон дэлхий дээрх цор ганц нинжагийн байгууллага болох Японы Нинжагийн зөвлөлийн хамтарсан төсөл юм.

Үзүүлбэрийн гол зохиолыг кабүки жүжигчин Дэнжиро Танака гаргажээ. Дэнжиро Танака нь Токио 2020 олимпийн нээлтээс эхлээд олон улсын чанартай олон тэмцээн, тоглолтод оролцож байсан туршлагатай жүжигчин юм. Шоуг Эдогийн үеэс уламжлагдан ирсэн арга барилаар тавина. Арга хэмжээ “DJ time”-аар эхлэх ба зочид цугларч, хоол, уух юм сонирхох зуур самурай дижэй хүмүүсийг хөгжөөнө. Гол үзүүлбэр нь дуугүй боловч аль ч улсаас ирсэн хүн ойлгох боломжтой. Үүний дараа самурай дижэй бүжигчид, бартендерүүдийн хамт эргэн ирж сүүлийн үзүүлбэрийг үзүүлнэ. Тасалбарын үнэ 8000 иен.

Дашрамд дурдахад, нинжагийн домогтой танилцахын зэрэгцээ хувцас түрээслэх, бүтэн өдрийн турш бэлтгэл хийх боломжийг олгодог олон газар Японд байдаг. Эдгээр сургуульд авирах, чимээ гаргахгүй хөдлөх, "шүрикен" шидэх зэрэг шилдэг нинжа нарын хийж чадах бүх тактикийг суралцдаг аж. Тухайлбал, "Edo Wonderland"-ыг зорин очсон аялагч бүр самурай, нинжа, Эдо хотын оршин суугч болон хувирч, тухайн цаг үеэр аялдаг. Энд хотын гудамж, самурайн байшин гээд бүх зүйл Эдогийн эрин үеийн барилга байгууламж хэлбэрээр баригджээ. Ажилтнууд уур амьсгалыг сайжруулж, бүх аялагч нартай нинжа мэт харьцдаг ажээ.

Эх сурвалж: JAPAN TODAY