Украины арми Курскт нэвтрээд долоо хонож байна. Тэд Даваа гаригийн үүрээр Белгород болон Украины Сумы мужийг холбосон хилийн Колотиловка шалган нэвтрүүлэх боомт руу дайрсан байна. Нөөц цэргүүд Покровка тосгоны ойролцоо хүлээж байгаа бөгөөд шаардлага гарвал хүч нэмэхэд бэлэн аж. Курск мужийн захирагч Алексей Смирновын Даваа гаригт хэлснээр Украины арми бүс нутгийн 28 тосгон, хотыг хяналтдаа авчээ. Мөн 12 энгийн иргэн амиа алдаж, 121 хүн шархадсан байна.

Курск орчимд тулаан ширүүсч буй тул иргэдийг нь нүүлгэн шилжүүлэх ажил үргэлжилж байна. Даваа гаригийн байдлаар 121 мянган хүнийг нүүлгэн шилжүүлсэн бөгөөд нэмж 59 мянган хүнийг аюулгүй газарт аваачих шаардлага байгаа аж.

АНУ-д төвтэй Дайны судалгааны хүрээлэнгийн мэдэгдсэнээр ОХУ хариу арга хэмжээ авахаар яаран хөдөлж, бэлтгэл муутай нэгжүүдийг дайны талбарт оруулсан гэв. ОХУ-ын арми Украины 260 цэрэг, нэг танк, АНУ-д үйлдвэрлэсэн Брэдли байлдааны найман машин зэрэг 31 хуягт машиныг устгасан байна.

Дашрамд дурдахад, ОХУ-ын нутаг дэвсгэрт орж ирсэн Украины хуягт машинууд бүгдээрээ ижил цагаан гурвалжин тэмдэгтэй байна. Украины Сумы муж дахь Т64 танкууд, ОХУ-ын Курскт орж ирсэн танк, хуягт машинууд бүгд гурвалжин тэмдэгтэй байгаа аж. Дэлхийн хоёрдугаар дайнаас хойш анх удаа Оросын газар нутагт халдан орж ирсэн энэ үйл ажиллагааг зарим ажиглагч "гурвалжин ажиллагаа" гэж нэрлэжээ. Гурвалжин тэмдэгийг анх Баруун бүсийн ажиллагааны командлалын бүлэг зургадугаар сард анзаарчээ.

Украины зарим эх сурвалж энэ тэмдэгийг нөхөрсөг галаас зайлсхийх зорилготой тэмдэг гэж тайлбарлажээ. Нөхөрсөг гал гэдэг нь дайн байлдааны үед өөрийн талаа андуурч буудахыг хэлнэ. Нөгөөтэйгүүр гурвалжин гэх мэт янз бүрийн хэлбэр дүрс нь орчин цагийн дайны нийтлэг үзэгдэл аж. Талууд ихэвчлэн ижил хувцас, техник хэрэгсэлтэй тул ялгарахын тулд ийм тэмдэг ашигладаг.

ОХУ-ын арми 2022 оны хоёрдугаар сард анх Украинд довтлоход танк, хуягт машинууд нь "Z" тэмдэгтэй байсан. Энэ тэмдэг нь сүүлдээ Путины дайныг дэмжсэн утга агуулгатай бэлгэдлийн чанартай зүйл болсон билээ.

Эх сурвалж: THE TELEGRAPH