Өнгөрсөн сард барууны орнууд болон Орос улс төрийн хоригдлуудаа солилцох үйл ажиллагааг зохион байгуулсан. Гэвч Беларусь улсын хувьд баруунтай харилцах байтугай өөрсдийн улс төрийн хоригдлуудаа эх оронд нь авчрах сонирхолгүй байгаа бололтой.

Хүний эрхийн "Viasna" байгууллагын мэдээлснээр Беларусийн 1400 гаруй улс төрийн хоригдол гаднын орнуудад хоригдож байгаа бөгөөд тэдгээр хүмүүс нь Александр Лукашенког эсэргүүцэгчид юм.

Жишээ нь, Нобелийн энх тайвны шагналт Алесь Беляцкий үг хэлэх, тэмцэх эрхээ эдэлснийхээ төлөө хоригдож байгаа ч хаана гэдэг нь тодорхойгүй. Биалиацкийн эхнэр Наталья Пинчук "Associated Press" агентлагт өгсөн ярилцлагадаа "Оросын иргэд суллагдсанд баяртай байна. Гэхдээ Беларусийн улс төрийн хоригдлуудыг хэн ч тоохгүй байгаад сэтгэл өвдөж байна. Барууны орнууд дараа нь Беларусийн хоригдлуудыг анзаараасай гэж хүсч байна" гэжээ.

Туркийн нисэх буудал дээр наймдугаар сарын 1-нд барууны орнууд Оросын улс төрийн хоригдлуудыг хүлээлгэн өгсөн. Үүний хариуд Орос 15 хоригдлыг нь өгсөн.

Баруунаас суллагдсан хоригдлуудын дунд Беларусийн  нэг иргэн байсан нь Рико Кригер байв.

"Viasna"-гийн мэдээлснээр, Лукашенко барууны зарим орнуудтай нууц хэлэлцээр хийж, өөрт нь саад болох сөрөг хүчний гишүүдийг нуун дарагдуулж байна. Тиймээс хүний эрхийн тус байгууллага яаралтай суллах ёстой 30 хүний жагсаалтыг гаргаж, Беларусийн засгийн газарт хүргүүлсэн аж.

2020 оны жагсаал

ЭРХ ЧӨЛӨӨНИЙ ДУУ ХООЛОЙГ СУЛЛАХЫГ ШААРДАЖ БАЙНА

Наталья Пинчук нөхрөө эсэн мэнд гэртээ эргэж ирэхийг хүсч байгаа тул "Viasna"-тай хамтарч буй. Сэтгүүлчид түүнээс нөхөртэйгөө холбогддог уу гэхэд "Беляцкий амьд байна гэсэн мессежийг хааяа л авдаг. Нөхрийн минь бие их муудсан бөгөөд хоригдож байгаа газар нь эм уулгадаггүй гэсэн. Түүнийг 2020 онд ерөнхийлөгчийн эсрэг жагсаалыг санхүүжүүлсэн хэргээр хорьж байгаа. Гэм зэмгүй хүнийг гүтгэж байгаа явдалд дургүйцэж байна" гэжээ.

Дор хаяж зургаан улс төрийн хоригдол шоронд нас баржээ.

Шоронд хоригдож буй сөрөг хүчний идэвхтэн Мария Колесниковагийн эгч Тациана Хомич хэлэхдээ, "Белларусийн хэлмэгдсэн улс төрийн хоригдлуудыг суллах ажил нээлттэй байх ёстой. Лущкашенкогийн засгийн газар хүний эрхийг ноцтой зөрчиж байна. Би эгчээсээ жил хагас нэг ч захиа авсангүй. Колесникова амьд үгүйг мэдэхгүй байна" гэжээ. "Viasna"-гийн мэдээлснээр Колесникова чанга дэглэмтэй хорих ангид 11 жил хоригдох ял авсан.

Колесниковаг 2020 оны наймдугаар сарын 9-ний сонгуулийн үеэр эсэргүүцлийн жагсаал зохион байгуулахад тусалсан гэх хэрэгт буруутгасан байна. Тухайн үед Лукашенко зургаа дахь бүрэн эрхийн хугацаагаа сунгаснаар сөрөг хүчин, иргэд бухимдлаа илэрхийлэн жагсаал хийсэн.

Оролцсон хүмүүсээс 35 мянган гаруй хүн нь баривчлагдаж, олон мянган хүн цагдаад зодуулжээ.

Сөрөг хүчний олон зүтгэлтэн ял авч, урт хугацаагаар шоронд хоригдож байгаа бол зарим нь гадаад руу зугтсан байдаг. Лукашенко баруунтай холбогдож, нэг иргэнээ татан авсан ч бусдыг нь үл тоож буй нь эмээж байгаагийн шинж бололтой. Рико Кригерийн хувьд улс төртэй ямар ч холбоогүй хүн бөгөөд Германд хүний амь насанд хүрэхийг завдсан гэх хэрэгт буруутгагдаж байсан. Үүнээс үзэхэд, Лукашенко улс төрийн хоригдлуудаа нууцлаг газар хаяхыг төлөвлөж байна.

ПУТИНЫ ХҮСЭЛ

"Viasna"-гийн мэдээлснээр Лукашенко Путины хүслээр Ригерийг сулласан. Учир нь энэ жил төрийн эрх барьсан 30 жилийн ойгоо тохиолдуулан Пукашенко Оростой харилцаа холбоогоо бататгахыг хүсч буй. Мөн үүнийг эсэргүүцсэн хүн бүрийг хорьж байгаа нь Беларусийн эр чөлөө нуран унаж байгааг харуулж байна гэж шинжээчид дүгнэв.

Соёлын сайд асан, одоо цөллөгт байгаа сөрөг хүчний идэвхтэн Павел Латушка Беларусийн хүний ​​эрхийн асуудлаар Германы хууль тогтоогчдод хандан захидал бичсэн байна. Түүнийг Минскийн шүүх засгийн газрын эсрэг янз бүрийн хэргээр эзгүйд нь буруутгасан байдаг.

Лукашенко Кригерийг сулласнаар ерөнхийлөгч Владимир Путины хүслийг биелүүлж байна гэж Латушка үзэв.

"Бид Путинтэй харилцах боломжгүй. Бидэнд байгаа харилцааны нэг суваг бол Беларусь дахь улс төрийн хоригдлуудын аймшигт байдлын талаар сайн мэддэг Герман болон бусад барууны засгийн газрын төлөөлөгчид юм" гэж тэрбээр "Associated Press" агентлагт хэлсэн байна.

Түүнчлэн, Польшийн гадаад хэргийн сайд Радек Сикорски Беларусийн улс төрийн хоригдлууд, тэр дундаа Беларус Польшийн цөөнхийн гишүүн, сэтгүүлч Анжей Почобутыг суллахыг шаардаж байгаа юм. Гэвч Беларусь улс Почзобутыг сулласныхаа хариуд Латушкаг шилжүүлэн өгөхийг шаардсан аж.

"Viasna"-гийн мэдээлснээр сүүлийн дөрвөн жилд 50 мянга гаруй беларусьчууд улс төрийн хэлмэгдүүлэлтэд өртсөн байна.

Өнгөрсөн долдугаар сард Беларусийн эрх баригчид хорт хавдар туссан сөрөг хүчний удирдагч Рихор Кастусиу зэрэг хүнд өвчтэй 19 улс төрийн хоригдлыг сулласан юм. Гэсэн хэдий ч шоронгийн өрөөг дүүргэхийн тулд гурав дахин олон идэвхтнүүдийг дараа нь баривчилсан гэж тус улсын шүүмжлэгчид мэдээлж байжээ.

"Беларусь дахь хэлмэгдүүлэлт улам бүр эрчимжиж, цагдаа нарын дайралт, баривчилгааны тоо нэмэгдсээр байна. Беларусчуудад барууны орнуудын дэмжлэг маш их хэрэгтэй байна" гэж Радек Сикорски нөхцөл байдлын талаар тайлбарлав.

Лукашенко ирэх жил дахин бүрэн эрхийн хугацаа авах гэж байгаа тул шинжээчид түүнийг ойрын үед дахин хоригдол суллана гэж найдаж байна. Бие даасан шинжээч Валерий Карбалевич "Лукашенко айдсаа даван туулж, 2020 оны цочролоос ангижирч чадаагүй тул ирэх жилийн ерөнхийлөгчийн сонгууль аливаа идэвхийг дарангуйлж, шоронгууд дүүрч, дарангуйллын хатуу орчин бий болно" гэж хэлжээ. Мөн Лукашенко улс төрийн хоригдлуудыг зөвхөн барууныхантай наймаалцах гэж зөвхөн Кремлийн зөвшөөрч байгаа хэмжээнд ашиглах болно гэж мэдэгджээ.

Эх сурвалж: ASSOCIATED PRESS, VIASNA.ORG