Хятад улс иргэний хэрэгцээнд зориулсан ачаа тээврийн хамгийн том дроныг туршлаа. Хоёр тонн даацтай хос хөдөлгүүр нисгэгчгүй нисэх онгоц Ням гаригт Сычуань мужид анхны нислэгээ хийжээ. Тус дроныг "Sichuan Tengden Sci-tech Innovation" компани үйлдвэрлэсэн бөгөөд далавч нь 16.1 метр, өндөр нь 4.6 метр. Хэмжээний хувьд дэлхийн хамгийн алдартай хөнгөн нисэх онгоц болох дөрвөн хүний ​​суудалтай "Cessna 172" онгоцноос арай том гэсэн үг аж.

Үүнээс өмнө Хятадын төрийн өмчит "Aviation Industry Corp"-ийн бүтээсэн ачаа тээврийн нисгэгчгүй онгоцыг зургадугаар сард туршжээ. "AVIC"-ийн "HH-100" дроны хувьд 700 кг даацтай, 520 км нислэгийн радиустай. Ирэх жил тус компани ачаа тээврийн хамгийн том дроныг туршихаар төлөвлөж байна. Энэ нь хоёр тонн ачаа тээвэрлэх бөгөөд "HH-100"-аас дөрөв дахин хол нисэх боломжтой.

Хятад улс хэдийнэ нисэгчгүй онгоцоор арилжааны хүргэлт хийж эхлээд буй. Тухайлбал, өнгөрсөн тавдугаар сард "Phoenix Wings" компани "Фэнжоу-90" дрон ашиглан Хайнань арлаас өмнөд Гуандун руу шинэхэн жимс хүргэжээ.

Дроныг цаашид такси тээвэр чиглэлээр хөгжүүлэхээр зорьж байна. "EHang Holdings" өнгөрсөн дөрөвдүгээр сард зорчигч тээвэрлэх нисгэгчгүй дроны үйлдвэрлэлийн гэрчилгээгээ Хятадын эрх баригчдаас хүлээн авчээ. Энэ нь Хятад улсад бие даасан зорчигч тээврийн нисгэгчгүй онгоцонд баримт бичиг олгож буй анхны тохиолдол болсон юм.

Эх сурвалж: REUTERS