Украины арми ОХУ-ын Курск мужид дайралт хийх үеэр нисгэгчгүй онгоцууд нь Беларусийн агаарын орон зайг зөрчсөн гэж мэдэгдээд буй. Тиймээс Украинтай хиллэдэг хилийн зурвасыг бэхжүүлэхээр Бямба гаригт нэмэлт цэрэг илгээжээ. Мөн Беларусийн Гадаад хэргийн яам Украины Хэргийг түр хамаарагчийг дуудаж, ийм хэрэг явдал давтагдахгүйн тулд арга хэмжээ авахыг шаардсан байна. Дахин ийм явдал давтагдвал Беларусь улсад Украины дипломат төлөөлөгч байх эсэхийг авч хэлэлцэнэ гэжээ.

Ерөнхийлөгч Александр Лукашенкогийн хэлснээр Беларусийн агаарын довтолгооноос хамгаалах хүчнийхэн Баасан гаригт ОХУ-тай хиллэдэг Могилев мужид Украины 10 орчим нисгэгчгүй онгоцыг устгажээ. Дараа нь Оросын Ярославль хотын ойролцоо мөн тодорхой тооны нисгэгчгүй онгоцыг устгасан гэв. Болзошгүй өдөөн хатгалгад бэлтгэлтэй байхын тулд Гомель, Мозырь дахь тактикийн бүсэд цэргээ бэхжүүлэх тушаал өгсөн байна.

Лукашенко хэлэхдээ "Украин яагаад ийм зүйл хийх болсныг ойлгохгүй байна. Бид үүнийг шалгах ёстой. Аливаа өдөөн хатгалгын хариуг барихгүй үлдээнэ гэж байхгүй гэдгийг тэдэнд уламжилсан" гэжээ.

"Беларус1" телевизийн сувгаар унасан нисгэгчгүй онгоцны хэлтэрхийнүүд гэх дүрс бичлэг үзүүлсэн байна.

Харин энэ талаар Украины Худал мэдээлэлтэй тэмцэх төвийн тэргүүн Андрей Коваленко мэдэгдэхдээ "Хилийн ойролцоо зэвсгийн байршуулалтыг нэмэгдүүлэх нь Путинд туслах, Украины командлалын анхаарлыг өөр тийш нь чиглүүлэх оролдлого" гэжээ.

Эх сурвалж: REUTERS