Зуны 33 дахь олимпийн наадам Парис хотноо сар дамнан үргэлжилж, өчигдөр/2024.08.11/ хаалтын үйл ажиллагаа нь боллоо. Дэлхийн 206 орны 10,714 тамирчин 32 спортын 329 багц медалийн төлөө өрсөлдөж, шилдгүүдээ тодруулж, суу алдраа дуурсгав.

ШҮҮМЖЛЭЛ ДАГУУЛСАН НЭЭЛТ

Парис хот 100 жилийн дараа дахин олимпийг хүлээн авч байгаа нь энэ. Энэ ч утгаараа гэрлийн хотоос их зүйл хүлээж байсан хүн олон байсан биз. Нээлтийн үйл ажиллагаа долдугаар сарын 26-ны өдөр Сена мөрөн дээр болсон нь анх удаагаа олимпийн нээлт цэнгэлдэхээс өөр газар нь болсон онцлог байлаа.

Нээлтийн найруулагчаар Томас Жолли ажилласан. Тэрбээр Францын түүхийг, Парис хотын гайхам байдлыг бүтээлдээ тусгахыг хүсчээ. Түүний бүтээлд Лэди Гага, Аяа Накамүра, Гожира, Марина Виотти, Селине Дион тэргүүтэй уран бүтээлчид оролцсон онцлогтой.

Нээлтийн үйл ажиллагааны 326 мянган тасалбарыг худалдаанд гаргасан бөгөөд үүний 222 мянга нь сайн дурын ажилчид, залуучууд болон орлого багатай гэр бүлүүдэд очжээ.

Парисын олимпийг Францын ерөнхийлөгч Эммануэль Макрон нээн үг хэлж, тус улсын өнөө цагийн шилдэг тамирчид болох жүдоч Тедди Риньер, гүйгч Марье-Хосе Переч нар галт бамбарыг тулганд асаасан юм. Энэ удаагийн олимпийн тулга ч цэнгэлдэхэд бус агаарын бөмбөлөгт байрлаж, тэнгэрт мандсан.

Нээлтийн дараа интернет орчинд хүмүүс Грекийн бурхад, Олон улсын олимпийн хорооны туг, Леонардо Да Винчигийн "Сүүлчийн оройн зоог" зураг, бяцхан бүжигчин охин, хэт задгайт хувцастай бүжигчид, сахалтай бүсгүй, толгойгүй эмэгтэй зэргийг шүүмжилсэн.

СПОРТУУД

Парисын олимпийн хөтөлбөрт 32 спорт багтсан. Үүний 28 нь өмнөх Рио болон Токиогийн олимпод багтсан спортууд байсан бол брейк бүжиг анх удаагаа олимпийн хөтөлбөрт багтаж, скейтборд, спорт авиралт, сөрфин нар дахин нэг удаа олимпод багтав.

2017 онд Парисын олимпийн зохион байгуулагчид цахим спортыг олимпийн нэг төрөл болгохоор ярилцаж байсан ч Олон улсын олимпийн хороо зөвшөөрөөгүй. Тэд цахим спортын тусдаа наадам хийхээр болсон.

ДАЙНЫ ХАЖУУГААР ДАЖИН

Парисын олимпийн үеэр террорист халдлага, элдэв жагсаал цуглаан, эмх замбараагүй байдал үүсч болзошгүй байв. Үүнд ч зохион байгуулагчид сайн анхаарлаа хандуулж, хамгаалалтаа чангатгаж, 75 мянган цагдаа өдөр бүр харуулд гарч байлаа.

Израиль-Хамасын дайны үеэр Израилийн тамирчдыг олимпод оролцуулсан нь палестинчуудад таалагдаагүй. Мөн Оросын Украинд явуулж буй цэргийн ажиллагааг үл умартсан Орос, Беларусийн тамирчдыг цагаан тугийн дор олимпод оролцохыг зөвшөөрсөн нь украинчуудад таалагдаагүй.

Палестин, Украин хоёр хоёулаа Олон улсын олимпийн хороонд хандаж, тэднийг оролцуулахгүй байхыг хүссэн ч тусыг эс олсон билээ.

МЕДАЛИЙН ЭЗЭД

Парисын олимпийн зарим тамирчид медалийн хур буулгаж, шагналын тавцанд нэгээс олон удаа зогсчээ. Тэдний тэргүүн эгнээнд Францын усанд сэлэгч, дараагийн Майкл Фелпс гэгдэж буй Леон Маршан орно. Тэрбээр дөрвөн алт, нэг хүрэл медаль хүртжээ. Түүний араас АНУ-ын усанд сэлэгч Торри Хаске гурван алт, хоёр мөнгөн медальтай, Австралийн усанд сэлэгч Молли О’Каллаган гурван алт, нэг мөнгө, нэг хүрэл медальтай тус тус удаалав. Харин АНУ-ын нэрт гимнастикч Саймон Байлс гурван алт, нэг мөнгөн медаль хүртсэн аж.

Багийн дүнгээр дараах улсууд тэргүүлжээ. 

1. АНУ – 40 алт, 44 мөнгө, 42 хүрэл – Нийт 126 медаль
2. Хятад – 40 алт, 27 мөнгө, 24 хүрэл – Нийт 91 медаль
3. Япон – 20 алт, 12 мөнгө, 13 хүрэл – Нийт 45 медаль
4. Австрали – 18 алт, 19 мөнгө, 16 хүрэл – Нийт 53 медаль
5. Франц – 16 алт, 26 мөнгө, 22 хүрэл – Нийт 64 медаль
6. Нидерланд – 15 алт, 7 мөнгө, 12 хүрэл – Нийт 34 медаль
7. Их Британи – 14 алт, 22 мөнгө, 29 хүрэл – Нийт 65 медаль
8. Өмнөд Солонгос – 13 алт, 9 мөнгө, 10 хүрэл – Нийт 32 медаль
9. Итали – 12 алт, 13 мөнгө, 15 хүрэл – Нийт 40 медаль
10. Герман – 12 алт, 13 мөнгө, 8 хүрэл – Нийт 33 медаль

АНУ-ын сүүлийн өдөр хүртэл хоёрдугаарт байрт байсан бөгөөд тус улсын сагсан бөмбөгийн эмэгтэй шигшээ баг финалд Францыг хожиж, алтан медаль хүртсэнээс тэдний алтан медаль Хятадтай тэнцэж, мөнгөн медалийнхаа тоогоор дээр нь гарсан юм.

Мөн Япон болон Нидерланд улсууд нийт медалийн тоо нь бага ч алтан медалийнхаа чанараар олон медальтай улсуудын дээр гарчээ. Хэрэв ОХУ-ын баг тамирчид оролцсон бол дээрх медалийн хүснэгт өөр байдалтай байх байлаа.

МОНГОЛ УЛС ПАРИСЫН ОЛИМПОД

Монгол Улсаа төлөөлөн есөн спортын 32 тамирчин Парисын олимпийг зорьсон. Угтаа Биеийн тамир, спортын улсын хороо, Монголын үндэсний олимпийн хороо 33 тамирчин гэж анх зарласан ч дугуйн тамирчин Б.Тэгшбаяр эрх аваагүй нь батлагдаж, сэлгээний тамирчнаар олимпийг зорьсон юм.

Монгол Улс энэ удаагийн олимпийг нэг мөнгөн медальтай өндөрлүүлсэн. Тодруулбал, жүдогийн эмэгтэйчүүдийн -48 кг-ын жинд дэлхийн аварга Б.Баасанхүү мөнгөн медаль хүртсэн. Тэрбээр Мальта, Австри, Парагвай, Испанийн шилдэг тамирчдыг ялсан ч финалд Японы Нацүми Цүнодад ялагджээ.

Чөлөөт бөхийн тамирчид болох Т.Тулга, Д.Отгонжаргал, Б.Хулан, П.Орхон нар хүрэл медалийн төлөө барилдсан ч ялагдаж, тавдугаар байраар олимпоо өндөрлүүлсэн амжилттай.

Монгол Улс хамгийн сүүлд Афины олимпийг нэг хүрэл медальтай өндөрлүүлж байжээ. Түүнээс хойш олимп бүрээр дор хаяж хоёр медаль авч байсан аж.

Ирэх 2028 оны олимп АНУ-ын Лос Анжелес хотод болно.