Хойд Солонгосын удирдагч Ким Жон Ун тус улсын Хойд Пёнган мужид өнгөрсөн Пүрэв, Баасан гаригт айлчилжээ. Тухайн мужид долдугаар сарын сүүл үеэс одоог хүртэл хүчтэй аадар бороо орж байгаа бөгөөд үерийн гамшиг нүүрлээд буй. Ким Жон Ун бүс нутгийн нөхцөл байдалтай танилцан, үерийн улмаас орон гэргүй болсон 15,000 хүнийг Пёньян руу нүүлгэн шилжүүлэх болсон байна.
Энэ талаар эрх баригч Ажилчны намын Родонг Синмум сонинд нийтэлснээр, Ким Хойд Пёнганы иргэдэд харамсаж буйгаа илэрхийлж, сэргээн босголтын ажилд 130,000 цэрэг дайчлах болсон. Мөн хохирсон иргэдийг нийслэл хотод үнэ төлбөргүй байраар хангана гэжээ.

Үерт нэрвэгдэгсдэд байшин барих, засварлах ажил дууссаны дараа мужийн нөхцөл байдал тогтворжиход дор хаяж хоёроос гурван сар шаардлагатай гэж Ким тооцоолжээ. Сэргээн босгох ажил дуустал 15 мянга гаруй хүнийг, тэр дундаа өндөр настан, хүүхдүүдийг  нүүлгэн шилжүүлэх аж.  Сонины гэрэл зургуудад Ким нутгийн иргэдтэй ярилцаж, майханд хүүхэд тэвэрч буйг харуулсан байна. Мөн тэрбээр тусламж санал болгосон улс орон болон олон улсын байгууллагуудад талархал илэрхийлэв. Гэхдээ Хойд Солонгос "өөрийн хүч, хичээл зүтгэлээр сэргэн мандана" гэж хэлжээ.

Эх сурвалж: YONHAP