Японы Цаг уурын агентлаг Кьюшү арлыг доргиосон 7.1 магнитудын хүчтэй газар хөдлөлтийн дараа Пүрэв гаригт анх удаа мега газар хөдлөлтөөс сэрэмжлүүлсэн тусгай зөвлөмж гаргажээ. Энэхүү зөвлөмж нь Номхон далайн эрэг дагуух Нанкай хотгорын орчимд болж болзошгүй мега газар хөдлөлтөөс урьдчилан сэргийлэх арга хэмжээний нэг хэсэг юм. Гамшгийн магадлал өндөр байгааг мэргэжлийн байгууллага анхааруулж байна.

Японы 47 мужийн 29-ийнх нь 707 засаг захиргааны нэгжийг 6 ба түүнээс дээш хүчтэй магнитудын чичирхийлэл, 3 метрээс дээш өндөр цунами болох эрсдэлтэй гэж тогтоожээ. Үүнд нийслэл Токио хот багтана. Тиймээс эдгээр засаг захиргааны нэгжийг газар хөдлөлтөд бэлэн байгаа эсэхийг шалгахыг уриалж байна.

Мөн тавилгаа унагахгүйн тулд сайтар бэхлэхийг албаныхан зөвлөж буй. Иргэдийг нүүлгэн шилжүүлэх газар болон гэр бүлийн гишүүдээ аюулгүй эсэхийг мэдэх аргаа баталгаажуулахыг мөн сануулж байна. Аюулгүй байдлын үүднээс нялх хүүхэд, өндөр настан, хөгжлийн бэрхшээлтэй иргэнтэй айл өрхүүдийг сайн дураараа нүүхийг зөвлөжээ.

Нанкай хотгорын газар хөдлөлт нь Шизүока мужийн Суруга булан болон Кьюшүгийн Хюганада тэнгисийн хоорондох хавтангийн хил дээр 100-200 жил тутамд тохиолддог 8 баллын хүчтэй газар хөдлөлт юм. Ойрын 30 жилд тус бүс нутагт 8-9 магнитудын хүчтэй газар хөдлөлт болох магадлал 70-80 хувьтай байна. Засгийн газрын тооцоолсноор хамгийн муу хувилбараар бодлоо гэхэд 230 мянга гаруй хүний амь нас хохирч, хоёр сая орчим барилга байшин сүйдэж магадгүй ажээ.

Баасан гаригийн оройны байдлаар Токио орчимд 5.3 магнитудын хүчтэй газар хөдөлсөн байна. Японы газар хөдлөлтийн 0-7 хүртэлх хэмжүүрээс энэ удаагийн газар хөдлөлтийг 5 гэж үнэлжээ. Хамгийн хүчтэй мэдрэгдсэн хэсэг нь Канагава мужийн Ацүги хот орчимд байна.

Эх сурвалж: NHK