Украины арми Мягмар гаригт Курск муж руу хуягт машин, их буу, нисгэгчгүй онгоцоор зэвсэглэсэн хэдэн 100 цэрэг илгээсэн. Украин цэргүүд 5000 хүн амтай Суджа хотод Мягмар гаригийн өглөө ойртжээ. Улмаар Лхагва гаригийн үдээс хойш Суджа хотыг бүсэлж, гурван тосгоныг эзлэн авсан. Оршин суугчид их буу, нисгэгчгүй онгоцны дайралтаас биеэ хамгаалахын тулд хотоос дүрвэж, зарим нь хонгилд нуугдаж байна. Энгийн иргэдийг нүүлгэн шилжүүлэх ажил замбараагүй байгааг хэвлэлд мэдээлж байна.

Суджа нь Оросын байгалийн хийг Украинаар дамжуулан Европ руу хүргэдэг цорын ганц шахуурга байрладаг чухал хот юм. Дайны байдалтай байгаа ч Украин улс ЗХУ-ын үеийн хийн хоолойг Газпром компанид жилийн хоёр тэрбум ам.доллараар түрээсэлдэг. Транзит тээврийн хэлэлцээр нэгдүгээр сард дуусна. Суджа орчимд нөхцөл байдал хүндэрснээр ОХУ нь Украин дахь транзит системээр дамжуулан Европын холбоонд байгалийн хий нийлүүлэхээ зогсоох эрсдэлтэй гэдгийг шинжээч Алексей Куш хэлжээ.

Дэлхийн хамгийн эртний станцуудын нэг болох Курскийн атомын цахилгаан станц нь Суджа хотоос зүүн тийш 70 км-ийн зайд Курчатов хотод байрладаг. Гэтэл Курчатов хотод Украины нисгэгчгүй онгоцууд илэрсэн байна. Зарим шинжээчийн үзэж буйгаар Украины арми ОХУ-ын эрчим хүчний системийг тогтворгүй болгохыг хүсч байгаа аж.

Курск орчмын дайралтыг ОХУ-ын ерөнхийлөгч Путин бүрэн хэмжээний өдөөн хатгалга гэж нэрлэжээ. Мөн Украины арми орон сууцны хороолол болон энгийн иргэд рүү ялгалгүй буудсан гэж буруутгасан байна. Энэ тулаанаар украинчууд 260 цэргийн албан хаагч, долоон танк, 42 хуягт машин, агаарын довтолгооноос хамгаалах хоёр машин, радио саатуулах станцаа алдсан гэж ОХУ мэдэгдэв.

Эх сурвалж: AL JAZEERA