АНУ-ын ширээний теннисний шигшээ багийн тамирчин Лили Жан энэ жил дөрөв дэх олимпдоо оролцжээ. Өдгөө 28 настай тэрбээр Парисын олимпийн эмэгтэйчүүдийн ганцаарчилсан төрлийн шилдэг 16-д багтаж, аяллаа өндөрлүүлсэн аж. Америктаа дийлдэшгүй Лили олимп, дэлхийн аваргад л одгүй нэгэн гэнэ. Олимп бүрээр л найдлага тээж ирдэг ч санасан, зорьсон амжилтдаа хүрч чаддаггүй. Ээж, аав нь ч охиноо спортоо орхиж, ажилд оруулахыг хүсдэг гэлээ.

Лилигийн ээж Линда Лиу "Wall Street Journal"-д өгсөн ярилцлагадаа "Нөхөр бид хоёр үргэлж л түүнийг тоглохоо боль гэж ятгадаг. Бид түүнийг бусад шиг энгийн ажил хийгээсэй гэж хүсдэг. Хятад эцэг, эхийн хувьд бид түүнийг боловсролдоо анхаарч, тогтвортой карьертай болох ёстой гэж боддог. Би түүнийг ажилд орж, ердийн амьдарна гэдэгт итгэдэг" гэв.

Лили 2012 оны Лондонгийн олимпийн дараа эцэг, эхийнхээ үгийг дагаж, спортоо орхих дөхжээ. Гэхдээ чадаагүй гэнэ. Дахин Риогийн олимпийн эрхээ авч, өрсөлдөв.

Калифорнид төрж, өссөн Лилигийн хүүхэд нас Стэнфордын их сургуулийн кампус дотор өнгөрчээ. Учир нь түүний аав их сургуулийн математикийн профессор байсан бол түүний ээж нь ширээний теннисний тамирчин байлаа. Ээжийгээ дагаж, Лили спортод дурлаж, тамирчин болов.

Лили гал тогооныхоо хоолны ширээн дээр теннис тоглодог байжээ. Улмаар 2007 онд анхны тэмцээндээ оролцож, өдийг хүртэлх замнал нь эхэлсэн түүхтэй.