Парисын олимпод оролцож буй Хойд Солонгосын тамирчдад "Samsung" ухаалаг гар утас олгосон нь НҮБ-ын Аюулгүйн зөвлөлийн тогтоолыг зөрчсөн үйлдэл байж болзошгүй гэж Өмнөдийн албаныхан Пүрэв гаригт мэдэгдэв. НҮБ-ын Аюулгүйн зөвлөлийн 2397 дугаар тогтоолын 7-р зүйлд заасны дагуу үйлдвэрлэлийн машин техникийг Хойд Солонгост шууд болон шууд бусаар нийлүүлэх, худалдах, шилжүүлэхийг хориглосон. Энэ тогтоолын дагуу гар утсыг ч бас хориглосон зүйлд тооцож буй аж.

Олимпийн түнш "Samsung Electronics" компани бүх тамирчинд хамгийн сүүлийн үеийн "Galaxy Z Flip 6" ухаалаг гар утасны олимпийн наадамд зориулсан тусгай цувралыг тараасан. Хойд Солонгосын Үндэсний олимпийн хороо утсыг хүлээж авснаа мэдэгдсэн боловч тамирчдадаа тараасан эсэх нь баталгаагүй аж. Олон улсын олимпийн хороо Пүрэв гаригт мэдэгдэл гаргахдаа "Хойд Солонгосын тамирчид гар утсыг аваагүй гэдгийг бид баталж чадна" гэжээ.

Өмнөд Солонгосын засгийн газар НҮБ-ын Аюулгүйн зөвлөлийн тогтоолуудыг хэрэгжүүлэхийн тулд олон улсын хамтын нийгэмлэгтэй хамтран дипломат хүчин чармайлт гаргаж байна гэж мэдэгджээ. Тодруулбал, хойд солонгос тамирчид гэртээ харихдаа гар утсаа авч явахаас урьдчилан сэргийлэх арга хэмжээ авахаар Өмнөд Солонгосын тал Олон улсын олимпийн хороо болон Франц улстай ярилцаж байгаа аж.

2018 оны олимпоор Хойд Солонгосын тал "Samsung"-ын гар утсыг авахаас татгалзаж байсан удаатай. Тухайн үед мөн эх орондоо буцахдаа гар утсаа буцааж өгөх нөхцөл тавьж байжээ.

Эх сурвалж: YONHAP