“ABC News” есдүгээр сарын 10-нд Дональд Трамп, Камала Харрис нарын анхны мэтгэлцээнийг зохион байгуулна гэж мэдэгдэв. Трамп өнгөрсөн Пүрэв гаригт "Ардчилсан намын өрсөлдөгчтэйгээ мэтгэлцэхэд бэлэн байна" гэж хэлснээр тов батлагдав.
"Бид гурван мэтгэлцээн хийх ёстой гэж бодож байна" гэж Трамп хэлсэн ба “Fox News” болон “NBC”-ээр тус тус зохион зохион байгуулах хүсэлтэй байгаагаа илэрхийлжээ.
Харрис Пүрэв гаригт Мичиган мужид болсон арга хэмжээнд оролцохдоо “ABC”-ийн мэтгэлцээнд оролцохоо баталж, дараа нь нэмэлт мэтгэлцээнд нээлттэй гэж мэдэгдэв.

Мэтгэлцээнийг “World News Tonight”-ийн хөтлөгч, удирдах редактор Дэвид Муир, “ABC News Live Prime” телевизийн хөтлөгч Линси Дэвис нар удирдан явуулна.

Бүгд найрамдах намаас нэр дэвшигч Трамп өнгөрсөн зургадугаар сард ерөнхийлөгч Жо Байдентай нэг удаа мэтгэлцсэн. Тэд есдүгээр сарын 10-нд дахин мэтгэлцхээр төлөвлөж байсан ч Байден  ерөнхийлөгчийн өрсөлдөөнөөс татгалзсан юм. Улмаар Харрис Ардчилсан намаас нэр дэвших болсон.

Эх сурвалж: BBC