Нэмэлт 15:40

Газар хөдлөлтийн улмаас ерөнхий сайд Фүмио Кишидагийн Төв Ази дахь айлчлал цуцлагджээ. Фүмио Кишида хэвлэлийн бага хурлын үеэр хэлэхдээ "Бидний бэлтгэл, харилцаа холбоо хэвийн байгаа эсэхийг баталгаажуулахын тулд би ирэх долоо хоногт гадагшаа айлчлахгүйгээр шийдсэн" гэжээ. Тус улсын засгийн газар бүс нутгийн удирдагчидтай цахимаар уулзалт хийхээр төлөвлөж байгааг "NHK" агентлаг мэдээлэв.

Японы баруун өмнөд хэсэгт Кьюшү арлын Мияазаки мужийн эрэгт Пүрэв гаригт орон нутгийн цагаар 16:42 цагт 7.1 магнитудын хүчтэй газар хөдөлжээ. Албаныхны мэдээлснээр томоохон осол гэмтэл гараагүй ч гурван хүн гэмтэж бэртсэн байна. Газар хөдлөлтийн дараа Японы Цаг уурын агентлаг хуралдаж, Номхон далайн баруун эргийн ойролцоо дахин хүчтэй газар хөдлөлт болох магадлалтай байгааг мэдээлэв. Тиймээс иргэдийг ирэх долоо хоногт сонор сэрэмжтэй байхыг уриалжээ.

Газар хөдлөлт болсноос хойш хагас цагийн дараа Кьюшү арлын өмнөд эрэг болон ойролцоох Шикокү арлын дагуу 0.5 метр хүртэл цунамийн давалгаа илэрчээ. Тухайн үед цунамийн сэрэмжлүүлэг гаргасан боловч сүүлд нь цуцалсан байна.

Цөмийн зохицуулалтын газраас Кьюшү болон Шикокү дахь цөмийн 12 реактор бүгд аюулгүй хэвээр байгаа гэж мэдэгджээ. 2011 оны гуравдугаар сард болсон 9.0 магнитудын хүчтэй газар хөдлөлтийн улмаас үүссэн цунами Фүкүшимагийн атомын цахилгаан станцыг цөмийн гамшигт хүргэсэн. Үүнээс хойш Японы нутаг дэвсгэр дэх атомын цахилгаан станцтай бүс нутгуудад газар хөдлөлт ихээхэн түгшүүр төрүүлэх болсон.

Дашрамд дурдахад, ерөнхий сайд Фүмио Кишида атомын бөмбөгдөлтөөс хойш 79 жил өнгөрч буй энэ өдрүүдэд Нагасаки хотод ажиллана. Эндээс залгуулаад тэрбээр Казахстан, Узбекистан, Монголд айлчлахаар төлөвлөж буй. Газар хөдлөлтөөс шалтгаалаад айлчлалын төлөвлөгөөгөө эргэн харах болж магадгүй гэж тэр мэдэгджээ.

Мөн тэрбээр "Засгийн газраас гаргаж буй шинэ мэдээлэл бүрийг анхааралтай сонсч, өдөр тутамд газар хөдлөлтийн бэлэн байдлаа ханган, шаардлагатай үед яаралтай нүүлгэн шилжүүлэлтэд бэлэн байхыг иргэдээс хүсч байна" гэжээ.

Эх сурвалж: REUTERS, NBC