Зуны налгар өдрүүд дуусч, найртай намрын өдрүүд үргэлжилж буй. Гэвч, зун, намрын улирал цаг, нартай. Нэг л өглөө цас орж, монголчууд бид өвөлтэйгөө золгон, утаа, түгжрэл, эрчим хүч, ханиад томуу, халтиргаа гулгаа гээд өнөөх л олон асуудалайгаа нүүр тулна. Гэтэл өвлийн бэлтгэл ажлын талаар ам нээж байгаа хүн алга, хувь, хувьсгалгүй өвөл болохгүй юм шиг зуун жилдэж, зугаалж, наадаж байна. Уг нь хэн, хүнгүй л өвөлдөө өнөөдрөөс бэлдмээр байна.

Улаанбаатар өвөлдөө утаа, угаартаа баригдахаас гадна гудамж талбай нь яг мөсөн гулгуур шиг болдог. Өнгөрсөн өвөл олон хүн халтирч унаснаас бэртэж, гэмтсэн.   Учир нь, Монгол Улсад стандарт гэдэг зүйл байнга алдагддагийн нэг жишээ бол явган хүний зам. Жил бүрийн хавар явган хүний замын хажуугийн хашлага сольж, хэдэн замыг хэсэгчилж хааж шинэчлэхээс өөр ажил хийдэггүй гэхэд нэг их хол зөрөхгүй.

Улаанбаатарын гудамж, талбайг гантиг гөлгөр чулуун хавтангаар хийсэн нь  өвөлдөө том асуудал дагуулдаг. Угтаа бол гантиг чулуун хавтангаар дулаан орнууд замаа гоёдог. Харин Монгол шиг эрс тэс уур амьсгалтай оронд энэ нь тохирох зүйл биш гэдгийг захын иргэн хэлдэг.  Үүнээс болж хэдэн зуун хүн гэмтэж, эрүүл мэндээрээ хохирч эмнэлгийн үүд сахидаг.

Нийслэлд 66 мянган мкв гантиг чулуун зам байснаас жил бүр барзгар чулуун хавтангаар сольж янзалсны хүчинд одоогийн байдлаар 30 орчим мянган мкв гантиг чулуун зам байгаа аж.

Тухайлбал, Арслантай гүүр, Сүхбаатарын талбай, Улаанбаатар галерей, МУИС зэрэг хамгийн их хүн зорчдог газруудад жаахан цас хялмаалахад явахад хүндрэлтэй болдог. 2023 онд явган хүн зорчиход эрсдэлтэй 84 байршлын налуу хэсгийг барзгар хавтангаар сольж янзалсан гэж тухайн үед албаныхан мэдээлж байсан.

Энэ онд уг явган хүний замыг шинэчилж, нийтийн эзэмшлийн зам талбайг засаж янзлахад 45.6 тэрбум төгрөг зарцуулахаар болсон байна.

Нэг ажил хийх гэж тендер зарлана, шалгаруулна зэргээр нэлээд хугацааг зарцуулдаг жишгээр гантиг чулуун замыг засахад ч мөн тендер зарлах учиртай, энэ нь өнөөдрийг хүртэл шийдэгдээгүй, гүйцэтгэх газар нь шалгарчихвал ажил нь хийгдэнэ гэдгийг албаныхан хэлсэн юм. Энэ мэт анхнаасаа төлөвлөгөө судалгаагүй зүйл хийнэ, эргээд дахин дахин засаж, үргүй зардал гаргадаг олон асуудал бий. Өвөл хаяанд ирчихсэн байхад гүйцэтгэгч нь зарлагдаагүй л байна. Ингэж байсаар өвөлтэйгөө золгож, өнөөх гялгар хавтан дээрээ хэдэн зуугаараа унаж, бэртсэн хэвээрээ байх вий дээ.