Хөвсгөл аймгийн Рэнчинлхүмбэ сумын нутаг Шишгэд голд гурван хүн моторт завиар зугаалж яваад осолджээ. Тодруулбал тухайн гурван иргэний зугаалж явсан завь хөмөрч нэг иргэн ор сураггүй болжээ.

Тус газар нь аймгийн төвөөс хойд зүгт 300 км, сумын төвөөс хойд зүгт 100 км зайтай.

Хөвсгөл аймгийн Онцгой байдлын газрын Эрэн хайх, аврах салбарын  алба хаагчид, Үндэсний аврах бригадын алба хаагчид ар гэрийнхэнтэй хамтран осолдсон иргэнийг эрэн хайх ажиллагааг наймдугаар сарын 07-ны өдрийн 08:00 цагаас эхлүүлжээ. Нийт таван алба хаагч 2 бүлэгт хуваагдан анх осолдсон газраас явганаар голын урд болон хойд эргээр нийт 1.2 км зайд,  дроноор усны мандлаас дээш 2 метрийн өндрөөс самналт хийсэн ч үр дүнд хүрээгүй байна. Иймд эрлийн ажиллагааг өнөөдөр /2024.08.08/-ны өдрийн 08:00 цагт дахин эхлүүлжээ.

Түүнчлэн нийслэлийн Хан-Уул дүүргийн 11 дүгээр хороо буюу Маршлын гүүрний баруун талд нэг иргэн усанд осолдсон байна. Тодруулбал өчигдөр /2024.08.07/ өдрийн 12:00 цаг орчимд Туул голын усанд урсаж байсан иргэнийг ОБЕГ-т мэдээлжээ. Дуудлагын дагуу нийслэлийн Аврах ангийн алба хаагчид тухайн байршилд очин осолдсон иргэнийг эрэн хайх ажиллагааг эхлүүлсэн байна. Эрэн хайх ажиллагааны үр дүнд тухайн иргэний цогцсыг модонд гацсан байдалтайгаар олж, тус дүүргийн Цагдаагийн нэгдүгээр хэлтэст шилжүүлсэн гэж мэдээллээ.

Аялал зугаалгын сар үргэлжилж буйтай холбоотойгоор иргэд усанд осолдох тохиолдол нэмэгдсэн. Он гарсаар улсын хэмжээнд өнөөдрийн байдлаар 74 удаагийн усны ослын дуудлага бүртгэгдэж, 86 хүн амь насаа алдсан байна. Үүний 67 нь том хүн, 19 нь хүүхэд байгаа юм.

Иймд:

• Стандартын бус завь, хөвөгч хэрэгслээр гол, нуурын усанд зугаалахгүй байх,
• Согтууруулах ундаа хэрэглэсэн үедээ гол, ус руу орохгүй байх, хамт олон найз нөхдөөрөө амарч, зугаалах үедээ бие биедээ хараа хяналт тавих,
• Тээврийн хэрэгслийн жолооч нар баталгаагүй зам, гарц, гарамгүй газраар гол гатлахгүй байх, тээврийн хэрэгслийн найдвартай байдлыг хангаж зорчихыг Онцгой байдлын байгууллагаас анхааруулж байна.