Бага насны гурван охин амиа алдсан хэргийн дараа цагаачдын эсрэг жагсаал гарч, Их Британи даяар эмх замбараагүй байдал өрнөөд байна. Хойд Лондон, Бристол, Ньюкасл зэрэг хотуудад долоо хоног үргэлжилсэн эмх замбараагүй байдлын дараа арьс өнгө, үндэс угсаагаар ялгаварлан гадуурхаж буй жагсагчдын эсрэг олон мянган хүн цугларч, эсэргүүцлээ илэрхийлжээ. Тодруулбал, арьс өнгөөр ялгаварлан гадуурхалтын эсрэг хөдөлгөөн өрнүүлж буй иргэд дээрх хотуудад цугларч "Дүрвэгсэд тавтай морилно уу" зэрэг уриа лоозон барьсан байв. Тиймээс цагаачдын эсрэг жагсагчид арьс өнгөөр ялгаварлан гадуурхалтын эсрэг хөдөлгөөн өрнүүлж буй хүмүүсийн дунд мөргөлдөөн гарч болзошгүй байдалд хүрлээ.

Хойд Лондон, Бристол, Ньюкасл болон Саутпорт хотын цагдаа нар бүрэн хүчээ дайчилж, хоёр жагсаалыг тараах 100 гаруй арга хэмжээ авч ажиллах болно гэж мэдэгдсэн байна.

Саутпорт хотод долдугаар сарын 29-нд гурван бага насны охин хутгалуулж нас барсан. Сэжигтнийг 17 настай исламын шашинт цагаач үйлдсэн гэх ташаа мэдээлэл гарснаас болж цагаач, дүрвэгсдийн эсрэг жагсаал гарсан юм. Эдгээр жагсагчид гэм зэмгүй цагаач, дүрвэгсэд рүү халдаж эхэлсэн тул ялгаварлан гадуурхалтын эсрэг хөдөлгөөн өрнөж эхэлсэн байна.

Өнгөрсөн долоо хоногт болсон эмх замбараагүй байдлын үеэр орогнол хүсэгчдийн байрлаж байсан сүм хийд, зочид буудал, зарим дэлгүүрүүдийг жагсагчид галдан шатаасан байна. Мөн Их британийн томоохон дэлгүүрүүд халдлагад өртөхөөс урьдчилан сэргийлж цонхнуудаа битүүмжилдэг болжээ. Цагаачлалын асуудал хариуцдаг хуулийн фирмүүд ажилчдаа гэрээсээ ажиллах тушаал гаргаж, ямар нэгэн халдлага гарсан бол цагдаад мэдэгдэхийг сануулсан байна. Одоогийн байдлаар Их Британид:

• Ливерпүүл хотод арьс өнгөөр ялгаварлан гадуурхалтын эсрэг хөдөлгөөний гишүүд цагаачлалын асуудал хариуцсан байгууллагуудын гадна цугларч, цагаач орогнол хүсэгчдэд туслахыг уриалаад байна.
• Уолтхэмстоу болон Норт Финчли хотод жагсаал өрнөж байсан ч Лхагва гаригийн байдлаар намжсан гэж Лондон хотын цагдаагийн газраас мэдээлэв.
• Бристол хотод 1500 орчим үйлдвэрчний эвлэлийнхэн, антифашистууд болон өнгөт арьст, ази гаралтай нийгэмлэгийн гишүүд цугларч гудамж талбайд ялгаварлан гадуурхалтын эсрэг уриалж байна.
• Брайтон хотод ялгаварлан гадуурхалтын эсрэг хөдөлгөөнийг төлөөлж найман хүн цагаачлалын албаны гадна цугларсан ч 2000 гаруй цагаачдын эсрэг жагсагчдад бүслүүлсэн. Тиймээс тухайн найман хүнийг цагдаагийн газар хамгаалалтад аваад байна.
• Ньюкастл хотын Бикон төвийн гадна 1000 гаруй исламын шашинт орнуудын цагаачид цугларч цагаач, дүрвэгсдийг дэмжихийг уриалж байна.
• Аккрингтон хотод исламын шашинтай цагаачдыг орон нутгийн үндсэн иргэд нь тэвэрч буй бичлэг цацагджээ. Тус хотод нөхцөл байдал харьцангуй тайван байна.
• Саутгемптон хотын Гросвенор талбайд 300-400 орчим хүн цугларч, "Арьс өнгөөр ​​​​ялгаварлагчид гэртээ харь", "Бидний гудамжнаас арьс өнгөөр ​​ялгаварлан гадуурхах үзлээ хол байлга" гэж хашхирч байна. Цагаачлалын эсрэг 10 орчим жагсагч тухайн ялгаварлан гадуурхалтын эсрэг хөдөлгөөн дээр очиж эмх замбараагүй байдал үүсгэсэн аж. Тиймээс цагдаа нар тухайн 10 хүнийг баривчлах гэж хичээсэн болов ч зөвхөн нэгийг нь хорьж чаджээ.

Өнгөрсөн долоо хоногийн Бямба гаригт жагсаал эхэлснээс хойш 400 жагсагчийг баривчилсан. Тэдгээр хүмүүсийн 140 нь эрүүгийн хэрэгт холбогдож, ял сонсох болжээ.

Эх сурвалж:BBC