Өмнөд Солонгосын Samsung корпораци таблет компьютерийн зах зээлд хөл тавьж, Берлин хотноо эхэлсэн IFA конференсийн үеэр Galaxy Tab хэмээн нэрлэсэн таблет компьютераа танилцуулсан байна. Уг төхөөрөмж нь Google-ийн Android үйлдлийн системтэй, 16GB болон 32GB багтаамжийн сонголттой аж. Гол өрсөлдөгч болох Apple-ын iPad-тай харьцуулбал илүү жижиг, хөнгөн буюу 380 грам жинтэй, 18 см буюу 7 инч дэлгэцтэй юм байна. Galaxy Tab төхөөрөмж нь мөн 3G сүлжээнд холбогдохоос гадна Wi-Fi болон Bluetooth холболттой юм. Vodafone компани тус таблетийг Европын зах зээлд ирэх сараас эхлэн нийлүүлэх талаар энэ үеэр мөн мэдэгджээ. Харин үнийн тухайд одоогоор тодорхойгүй байна.