Хонг Конгчууд олимпийн медаль хүртсэн тамирчдаа хөрөнгө мөнгөөр харамгүй шагнаж, урамшуулдаг. Тэд алтан медаль хүртсэн тамирчиндаа 768 мянган ам.доллар өгдөг нь энэ дэлхийд байхгүй өндөр урамшуулал. Тэгвэл энэ удаагийн Парисын олимпоос туялзуур сэлэмний тамирчин Вивиан Хонг алтан медаль хүртсэн. Тэрбээр хүнд сэлэмний төрөлд Францын тамирчин Орин Малло-Бретоныг ялж, олимпийн аварга болсон юм.

Вивиан Хонгийг эх орондоо эргэн ирэхэд ард түмэн нь нижгэр угтан авч, баяр хүргэсэн. Гэвч гэнэтийн шийдвэр гаргаж, зодог тайлж буйгаа зарлав. Тэрбээр ярихдаа "Гурав дахь олимпдоо оролцсоны дараа би мэргэжлийн тулязуур сэлэмнээс завсарлага авахаар шийдлээ. Би одоо шинэ замналаа эхлүүлэхээс тэсч ядаж байна. Хүүхдүүдэд баяр баяслыг олоход нь тусалж, спортоо эргүүлэн дэмжих буяны сан байгуулахаар зорино" гэжээ.

Тэрбээр Хонг Конгт ирснийхээ дараа шагналын мөнгөөрөө буяны сан эсвэл нийгэмд тустай байгууллага байгуулна гэж байв.

Өдгөө 30 настай Вивиан Хонг нь Стэнфордын их сургуулийг олон улсын харилцаагаар төгсч, Хятадын Ренминий их сургуульд хуулийн чиглэлээр мастер хамгаалжээ. Сүүлд гарсан мэдээллээр Вивианы мастерийн зэрэг хамгаалсан судалгааны ажил нь Хятадын "Нэг улс, хоёр систем" бодлогыг дэмжсэн, сайшаасан ажил байсан гэж шүүмжлэлд өртсөн гэнэ.