“Оном сан”-гийн ТУЗ-ийн дарга Д.Наранбаатар, ШУТИС-ийн Үйлдвэрлэлийн технологийн сургуулийг хувьчилсантай холбоотой асуудлаар өнөөдөр /2024.08.07/ мэдээлэл хийлээ.

“Оном сан”-гийн ТУЗ-ийн дарга Д.Наранбаатар "Монгол Улсад болж буй авлигын асуудлыг ерөнхийлөгчөөс эхлээд хүн бүр ярьдаг. Гэвч яг хулгай хийсэн хүмүүст хариуцлага хүлээлгэхгүй байна. М. Энхболд болон түүний эхнэр Ж.Туяацэцэг, УИХ-ын дарга, Боловсрол Шинжлэх ухааны сайд асан С.Төмөр-Очир нар нийлж 2024 оны дөрөвдүгээр сарын 1-нд Монгол Улсын хүнс, хөнгөний техник мэргэжлийн сургуулийг нэгтгэсэн Хүнсний технологийн коллежийг гурван өрөө байрны үнэд хүрэхгүй үнээр буюу 825 сая төгрөгөөр Менежментийн хувьчлал гэдэг нэрээр Баасанжавын Барамсай гэдэг хүнд авч өгсөн.

Үүний хариуд Баасанжавын Барамсай гэгч нь дээр дурдсан нэр бүхий этгээдүүдэд Хүнсний технологийн коллежийн олон тэрбумын үнэтэй байшин, газрыг том томоор нь авлигал болгон ѳгч байна.

Тодруулбал “Оном” сургуулийн хичээлийн байрыг 500 мянган төгрөгөөр үнэлээд хувьчлаад авчихсан. Хувьчилж авсныхаа дараа Ж.Туяацэцэг хоёр давхар хэдэн мянган МКв байрыг Санжмятавын Төмөр-Очирт, Хүнсний техник мэргэжлийн сургуулийн оюутны байр, хойд талын газрыг нь авлигад өгсөн. Оном сан"-гийн зүгээс энэхүү их хэмжээний авлигал, хээл хахуулийн хэрэгтэй холбоотой менежментийн хувьчлалыг хүчингүй болгохоор төрийн өмчийн бодлого зохицуулалтын газрыг захиргааны хэргийн шүүхэд өгсөн. Тухайн үед Захиргааны хэргийн анхан шатны шүүх хэрэг үүсгээгүй. Бид энэ тогтоолыг хүчингүй болгож хэрэг үүсгэхээр болсон.

Хүнсний Технологийн дээд сургууль гэдэг нэртэй хэдий ч нийгэмд үйлчлэх төрийн бус байгууллага байгуулсан. Улмаар өөрсдийнхөө хувийн дансаар маш их хэмжээний мөнгө авч байгааг баримттай мэдсэн.

Мөн Хүнсний технологийн коллежийн хувьчлал нь зохих журмын дагуу явагдсан эсэх, Хүнсний технологийн коллежоос бэлтгэгдэн гарч буй хүнсний чиглэлийн мэргэжилтнүүд монголын нийтийн эрүүл мэндийг хамгаалах ёстой гэтэл  төрийн өмчит сургуулийг хувьчлаад үйл ажиллагааг доголдуулж байна зэрэг асуудлаар захиргааны хэргийн шүүх хянаж үзэх нэхэмжлэл гаргасан. Авлигад холбогдоод авсан хөрөнгийг нь буцаагаад олон нийтийн өмч болгож зах зээлийн зарчмын дагуу дуудлага худалдаагаар зарж, улс мөнгөө авч байх ёстой"  гэв.