Цахим спортын "Counter Strike" төрлийн хамгийн нэр хүндтэй, томоохон тэмцээнүүдийн нэг болох "IEM Cologne" тэмцээн өнөөдөр/2024.08.07/ уламжлалт ёсоор Германы Кёльн хотод эхэлнэ. Нэг сая ам.долларын шагналын сантай тус тэмцээнд дэлхийн шилдэг 24 баг оролцож байгаа бөгөөд Азийн чансааг тэргүүлэгч Монголын "The MongolZ" өрсөлдөнө. Хуваарийн дагуу Монголын баг өнөөдөр 16.30 цагаас Португалын "SAW" багийн эсрэг тоглоно.

Өнгөрсөн жилийн "IEM Cologne" тэмцээнд "The MongolZ" баг урьдчилсан шатнаас хэсгийн шатанд шалгарч 13-16 дугаар байрт орсон билээ.

"The MongolZ"-ийн амралт ийнхүү дуусч, завгүй өдрүүд иржээ. Тэд өнгөрсөн сард Саудын Араб болон Энэтхэгт хоёр тэмцээнд оролцож, цахим спортын дэлхийн аваргад есдүгээр байр эзэлж, "Skyesports" тэмцээнд дэд аварга болсон амжилттай. Сүүлийн хоёр тэмцээний амжилтаараа дэлхийн чансааны аравдугаар байрт явж байсан ч энэ долоо хоногийн шинэчилсэн чансаагаар нэг байр ухарч, 11 дүгээр байрт явна. Мэдээж "The MongolZ" Азийн чансааг тэргүүлж байгаа.

"The MongolZ" урьдчилсан шатыг давж, хэсгийн шатанд шалгарах магадлал тун өндөр байна.

Багийн бүрэлдэхүүн:

• Б.Гарьдмагнай /bLitz/ – Багийн ахлагч
• М.Содбаяр /Techno4k/
• Б.Өсөхбаяр /910/
• Б.Аюуш /mzinho/
• М.Азбаяр /Senzu/
• Б.Эрдэнэдалай /maaRaa/ – Дасгалжуулагч
• С.Мөнххишиг /Winter/ – Менежер