Японы чөлөөт бөхийн олимпийн найдвар Юи Сүсаки өчигдөр/2024.08.06/ эхний тойрогтоо ялагдаж, шуугиан тарилаа. Тэрбээр 2014 оноос хойш 94 барилдаан дараалан нэг ч ялагдаагүй гэсэн сүрдэм үзүүлэлттэй дэвжээнд гарсан ч Энэтхэгийн Винэш Винэшийг дийлсэнгүй. Олимп, дэлхийн аварга Юи Сүсаки 2-3 гэсэн харьцаатай ялагджээ.

Нүдэндээ нулимстай дэвжээнээс буусныхаа дараа Юи Сүсаки "Энэ бүхэн үнэн эсэхийг мэдэхгүй байна. Миний форм тун сайн байсан. Анх удаагаа л түүнтэй барилдлаа. Энэ ч утгаараа түүнийг барилдааныг мэдэхгүй байсан. Сайн ч бэлдэж, түүний эсрэг барилдааны төлөвлөгөөтэй дэвжээнд гарсан. Гэр бүл, багийн хамт олон, бусад хүмүүсийн ачаар л би барилдаж ирсэн. Тэр бүх хүмүүсээс хүлцэл өчье. Тэдний цаг хугацаа, хичээл зүтгэл надаас болж үрэгдлээ" гэв.

Гурван жилийн өмнөх Токиогийн олимпоор Юи Сүсаки нэг ч оноо алдалгүй түрүүлж байлаа. Японы бөхийн холбооны мэдээлснээр өдгөө 25 настай Юи Сүсаки 2012 оноос хойш ердөө гуравхан барилдаанд л ялагдсан үзүүлэлттэй.

Юи Сүсаки үргэлжлүүлэн "Би шилдэг барилдаанаа гаргаж чадсангүй. Ийм л учраас би барилдаанууддаа ялагддаг. Энэ ялагдал намайг олимпийн аварга байх эрхгүйг харууллаа. Би өөрийгөө бөхөд зориулсан ч олимпийн аварга болж чадсангүй. Алдаагаа ухамсарлаж, юун дээр алдсанаа дахин харах болно. Дахин аварга болохын төлөө улам шаргуу хичээнэ" гэлээ.

Жүдогийн Үта Абэ болон чөлөөт бөхийн Юи Сүсаки нарын ялагдлыг япончууд адилтгаж байна. Хоёулаа л олимпийн аварга болох зорилготой Парисыг зорьсон ч санасандаа хүрч чадсангүй.

Юи Сүсаки өнөөдөр дагах барилдааныг Украины Оксана Ливачийн эсрэг хийнэ.