Дэлхий дахинаа Михаин Лопез гэх нэр төдийлөн танил биш ч Куба улсад үүн шиг алдартай нэр үгүй. Өчигдөр/2024.08.06/ Парисын олимпийн сонгомол бөхийн 130 кг-ийн тэмцээн явагдаж, Кубын алдарт бөх Михаин Лопез тав дахь удаагаа олимпод түрүүлэв. Тэрбээр алтан медалийн төлөө Кубын Ясмани Акостатай барилдаж, 6-0 гэсэн харьцаатай ялсан.

Өдгөө 41 настай Лопез таван олимп дараалан алтан медаль хүртэж байна.

“Эррадурагийн үлэмж биетэн” хэмээх хочтой Михаин Лопез 2008, 2012 онуудын олимпийн сонгомол бөхийн 120 кг-ийн жинд түрүүлж байсан бол 2016, 2021, 2024 онуудад 130 кг-д дараалан түрүүллээ.

Алтан медаль хүртсэнийхээ дараа Михаин Лопез "Энэ медалийг би ч гэлтгүй дэлхий нийт, эх орон минь хүссэн. Олимпийн наадмын манлайд хүрсэндээ баяртай байна. Энэ амжилт бол миний гэр бүл, хүн бүхний тусламжтай шаргуу хөдөлмөрлөсний шагнал. Энэ миний  амьдралын хамгийн том ялалт байлаа" гэжээ.

Барилдааны дараа Михаин Лопез борцовкио тайлж, дэвжээний голд байрлуулснаар зодог тайлж буйгаа зарласан юм. Тэрбээр анх 2004 оны олимпод оролцож, тавдугаар байрт орж байлаа. Михаин Лопез "Надаас зөвлөгөө авахаар ирдэг олон залуучуудад би маш их урам зориг өгдөг. Одоо би дэлхий нийтэд урам зориг өгмөөр байна. Би залуу үеэ бэлтгэмээр байна" гэв.

Түүнд ялагдсан Ясмани Акоста нь Чилийн түүхэн дэх анхны олимпийн медальтай бөх болжээ. Мөнгөн медаль хүртсэн тэрбээр "Би алтан медаль хүссэн. Гэхдээ Михиан шиг шунасангүй. Тэр бол бөхийн домог" гэжээ.