АНУ-ын тагнуулынхан Израиль руу ирж болзошгүй хоёр том дайралтыг бэлтгэлтэйгээр хүлээж байна гэж албаны хүмүүс мэдэгджээ. Цагаан ордны үндэсний аюулгүй байдлын эх сурвалж мэдээлснээр, Израиль руу Иран болон Хезболла дахин дайрна.

Хамасын удирдагч Исмаил Хание Тегеранд, Хезболлагийн ахлах командлагч Фуад Шукр Бейрут хотод алагдсаны дараа байдал дахин хурцдаад буй. Хамас болон Хезболла бүлэглэлүүд энэ аллагад Израилийг буруутгаж, хариу өгнө гэдгээ анхааруулсан юм. Израилийн эрх баригчид Ханиегийн үхлийн талаар ямар ч тайлбар хийгээгүй. Харин Шукрыг устгах тухайд Израилийн зүгээс хэлэхдээ “Энэ нь Голаны өндөрлөг дэх Друзуудын Маждал Шамс тосгоныг онилж, 12 хүний ​​амийг авч одсоны хариу арга хэмжээ” гэж мэдэгджээ. Харин “Хезболла” тус халдлагад оролцсон гэдгээ үгүйсгэж байна.

АНУ-ын ерөнхийлөгч Жо Байден  Даваа гаригт үндэсний аюулгүй байдлын ахлах багтайгаа уулзсан нь  Ираны зүгээс Израиль руу хариу цохилт өгч болзошгүй гэсэн болгоомжлол улам нэмэгдсээр байна. Байден Израилийг халдлагад өртсөн тохиолдолд дэмжлэг үзүүлэх бэлтгэлийн талаар танилцуулсан байна.  Мөн төрийн нарийн бичгийн дарга Антони Блинкен албаны хүмүүс хурцадмал байдлаас урьдчилан сэргийлэхийн тулд "цаг наргүй" ажиллаж байна гэж мэдэгдэв.

Эх сурвалж: TASS