Японы волейболын эрэгтэйчүүдийн шигшээ баг Парисын олимпийг тун харамсалтай үр дүнгээр өндөрлүүллээ. Тэд өчигдөр/2024.08.05/ шөвгийн наймд 2022 оны дэлхийн аварга Италийн шигшээ багтай учраа тааран тоглосон бөгөөд эхний хоёр ээлжийн тоглолтод ялж, 2-0 гэсэн тун сайн эхлэлийг тавьсан юм. Гурав дахь ээлжийн тоглолтод ч 24-21 гэсэн харьцаатай хожиж байв.

Ердөө ганцхан оноо авахад л Японы баг хагас шигшээд шалгарч, 52 жил хүлээж буй олимпийн медалиа авах боломжтой байсан гэхэд буруудахгүй. Гэвч Италийн шигшээ баг гурав дахь ээлжийн тоглолтод 27-25 гэсэн харьцаатай хожиж, амь гарсан. Улмаар дөрөв дэх ээлжийн тоглолтод 26-24 гэсэн харьцаатай хожиж, шийдвэрлэх тав дахь ээлжийн тоглолтыг гаргаж чадсан юм. Сүүлийн ээлжийн тоглолт дээр Японы багийн ахлагч Юки Ишикава хоёр оноо дараалан оноо авч, 15-14 гэсэн тэргүүллийг багтаа авчирсан. Гэвч төгсгөж чадсангүй. Тайши Онодера давуулалтаа алдаж, тоо тэнцсэн. Үүнийг нь Итали ашиглаж, Ишикавагийн цохилтыг Роберто Руссо хааж, дараа нь өөрөө оноо авч, 17-15 гэсэн харьцаатай Италийн шигшээ ялалт байгуулжээ.

Тоглолтын дараа Юки Ишикава "Би тоглолтыг тэгж төгсгөх ёсгүй байсан юм. Энэ ялагдалд би буруутай. Бид ялалтаа өөрсдөө алдчихлаа. Дэлхийн шилдэг багуудтай үргэлжлүүлэн сайн тоглолтоо гаргана. Өнөөдрийн тухайд би чухал оноонуудыг авах ёстой байлаа. Үнэхээр гутарч байна" гэжээ. Тэрбээр энэ тоглолтод 32 оноо авч, бүх тоглогчдыг тэргүүлсэн. Түүний цохилтыг хаахын аргагүй байсан үе бий.

Японы дасгалжуулагч франц мэргэжилтэн Филиппе Блайн "Хагас шигшээ бол бидний мөрөөдөл байсан. Одоо бол бид гунигтай байна. Миний хувьд энэ тоглолт Японы шигшээ багийг удирдсан сүүлийн тоглолт байлаа. Энэ ч утгаараа улам гунигтай байна. Өнөөдрийн тоглолтоороо залуус минь бахархах хэрэгтэй. Энэ тоглолтод хожих байсан юм гэж үргэлж харамсахаар боллоо" гэв.

Японы шигшээ багийн дундаж өндөр 190 см бөгөөд энэ үзүүлэлтээрээ шөвгийн наймд шалгарсан багуудаас хамгийн намханд тооцогдоно. Бусад долоон багийн дундаж өндөр дор хаяж 198 см байгаа аж.

Италийн шигшээ багаас Алессандро Микьелетто сайн тоглож, 24 оноо авчээ. Түүнээс гадна Юри Романо, Даниеле Лавиа нар тус бүр 19 оноо авсан гэнэ. Тоглолтын дараа Микьелетто "Эхний хоёр ээлжийн тоглолтод хожигдож, гурав дахь ээлжийн тоглолтод 21-24 гэж хожигдож байсан нөхцөл байдлаас яаж эргэн ирснээ мэдэхгүй юм. Хамтдаа хуруугаа нийлүүлж, ялалт байгууллаа. Бидэнд аз тохиолоо. Өнөөдөр бид гэртээ харихыг хүссэнгүй" гэлээ.

Волейболын хагас шигшээд Итали, Польш, Франц, АНУ гэсэн дөрвөн баг шалгарчээ.