Парисын олимпийн 3х3 сагсан бөмбөгийн тэмцээн тун гайхалтай болж өнгөрлөө. Эрэгтэй багуудаас Нидерландын шигшээ баг, эмэгтэй багуудаас Германы шигшээ баг түрүүлж, түүхэнд нэрээ үлдээв. Хагас шигшээ болон шигшээ тоглолтууд үзэгчдийг суудлаас нь өндөлзүүлж, уулга алдуулсан.

Эрэгтэй шигшээ багуудаас хагас шигшээд Латви, Франц, Нидерланд, Литви дөрөв үлдсэн. Эхний тоглолт хэсгийн шатыг тэргүүлсэн Латви болон эзэн орон Францын хооронд болж, 21-14 гэсэн харьцаатай Франц ялалт байгуулав. Тоглолтыг илүү баг нь болох Латви оноогоор тэргүүлж эхэлсэн ч францчууд алсын зайн шидэлтийг алдахаа мэдэхгүй амжилттай гүйцэтгэж, онооны зөрүүг арилгаад зогсохгүй өөрсдөө илүү гарсан. Үнэхээр Латвид боломж олгоогүй. Уг нь Америк, Серби хасагдсан учир Латвийг түрүүлэх өндөр магадлалтай боллоо гэж ярьж байсан ч Францын шигшээ нутаг дээрээ тэдний замд саад хийн өөрсдөө финалд хүрсэн юм.

Нөгөө талд Нидерландын шигшээ баг Литвийг асуудалгүй дийлж, 20-9 гэсэн харьцаатай хожсоноор финалд шалгарсан.

Финалын тоглолт эхлэхээс өмнө Плас де ла Конкорде үзэгчдээр дүүрч, багтаж ядсан. Кармело Энтони, Дөрк Новитцки, Пау Гасоль тэргүүтэй одод ирж, үзэж сонирхов. Тоглолт ч эхэлж, хоёр баг ээлж дараалан оноо авч, төгсгөл хэсэгт Францын шигшээ ялимгүй илүүрхэж, онооны тэргүүллийг авсан. Нутаг дээрээ гэсэн шиг үзэгчдийн дэмжлэг, уухай Парис хот даяар цуурайтаж, талбай дээр байгаа тоглогчид ч нөлөөлж, уур амьсгал ширүүссэн. Францын шигшээ яг оноо салах мөчид Нидерландаас Арвин Слагтер алсын зайн шидэлтийг амжилттай болгож, францчуудын чимээг дарав. Тоглолтын цаг дуусахаас хэдхэн секундын өмнө Франц нэг оноо илүү гарсан ч улбар шаруудын лидер Уорти Де Йонг хариуг нь барьж, тэнцүүлсэн. Улмаар тоглолт үндсэн цагт 16-16 гэсэн харьцаатай тэнцлээ. Нэмэлт цагийн эхлэлд Францаас эхний оноог авсан ч Уорти Де Йонг шууд хожлын төлөө тэмүүлж, хоёр онооны шидэлтийг хэцүү байдлаас амжилттай гүйцэтгэн 18-17 гэсэн харьцаатай ялсан юм. Түүний итгэмээргүй гайхалтай шидэлт Плас де ла Конкордед чуулсан францчуудыг чимээгүй болгож, алтан медалийг нь "булаасан" гэх хилсдэхгүй.

Эрэгтэйчүүдийн хүрэл медалийг Литвийн баг хүртсэн. Ингэхдээ тэд Токиогийн олимпийн аварга Латвийг буулган авчээ.

Эмэгтэй шигшээ багуудаас хагас шигшээд Герман, Канад, Испани, АНУ үлдсэн. Хагас шигшээн эхний тоглолтод Герман Канадыг ялж, финалд шалгарав. Дэлхийн чансааг тэргүүлэгч эгч дүү Плуффтэй Канадын шигшээд тооны харьцааг тэнцүүлэх боломж байсан ч тэд ашиглаж чадаагүй. Улмаар Германы шигшээ 16-15 гэсэн харьцаатай ялалт байгуулжээ.

Олимпоос өмнө Канадын шигшээг түрүүлэх өндөр магадлалтай багаар нэрлэж байв.

Харин нөгөө талд Испани, Америк таарч, цаг сунгаж, хүчийг үзсэнээс Испанийн шигшээ баг 18-16 гэсэн харьцаатай хожив. Олимпийн аваргаа хамгаалагч Америкийн бүсгүйчүүд хэсгийн шатанд тун тааруу тоглож, сүүлийн өдөр хасагдах шатанд шалгарсан билээ. Ийнхүү финалд Герман, Испани хоёр үлдэж, Дөрк Новитцкигийн нүдэн дээр нутгийн баг нь алтан медалийн эзэд болжээ. Тоглолтын сүүлийн мөчид Испаниас тооны харьцааг тэнцүүлэх шидэлтээ алдаж, 17-16 гэсэн харьцаатай хожигдсон аж.

Хүрэл медалийн төлөө Америк, Канад хоёр тоглож, 16-13 гэсэн харьцаатай Америк хожиж, хоёр олимп дараалан медаль хүртэж байна.