Парисын олимпийн 3х3 сагсан бөмбөгийн тун тэмцээн тун сонирхолтой үр дүнгээр үргэлжилж байна. Өчигдөр/2024.08.04/ хагас шигшээд өрсөлдөх эрэгтэй, эмэгтэй нийт найман багийн нэрс тодров. Амжилтаараа тэргүүлсэн эрэгтэй, эмэгтэй тус бүр хоёр баг хагас шигшээд шууд шалгарсан бол сүүл мушгисан хоёр баг нь хасагдаж, үлдсэн дөрвөн баг нь нэмэлт тоглолт хийхээр болсон.

Олимп эхлэхийн өмнө түрүүлэх хамгийн өндөр магадлалтай багаар АНУ-ын шигшээг нэрлэж байв. Харамсалтай нь, тэмцээн эхлээд удаагүй байхад Жиммер Фредетте цавиндаа бэртэл авч, тоглох боломжгүй болсон. Довтолгооны гол хүнээ алдсан АНУ-ын шигшээ багийнхан гурвуулаа үлдсэн тоглолтууддаа тоглож, хүссэн үр дүнгээ авч чадсангүй. Тэд хоёр хожил, таван хожигдолтой Хятадын хамтаар хомоол хамав.

Харин нөгөө талд дэлхийн аварга Сербийн шигшээ баг хэсэгтээ дөрөвдүгээр байр эзэлж, хасагдах шатанд шалгарсан. Гэвч нэмэлт тоглолтод эзэн орон Францын шигшээд 19-22 гэсэн харьцаатай хожигдож, гэртээ харилаа. Сербийн гол хүн Страхиня Стоячич энэ удаагийн олимпод сайн тоглолтоо үзүүлж чадсангүй.

Францад хожигдсон тоглолтын дараа Сербийн Марко Бранкович "Миний амьдралын хамгийн хүнд хожигдлуудын нэг байлаа. Одоо 20 хоногийн Европын цом эхэлнэ. Түүнд анхаарлаа хандуулна. Өнөөдөр Франц илүү нь байлаа. Тэдэнд баяр хүргье. Бас ирэх тоглолтуудад нь амжилт хүсье" гэжээ.

Ийнхүү эрэгтэйчүүдийн хагас шигшээд Латви, Франц, Нидерланд, Литви гэсэн улсууд үлдлээ.

Харин эмэгтэйчүүдийн хагас шигшээд Герман, Испани, Канад, АНУ гэсэн улсууд үлджээ. АНУ-ын шигшээ баг 0-3 гэж тэмцээнээ эхлүүлсэн ч дөрвөн тоглолт дараалан ялж, улмаар нэмэлт тоглолтод Хятадыг хожсоноор хагас шигшээд шалгарсан юм.