Америкчууд дахин нэг удаа дэлхийн хамгийн хурдан нь гэдгээ баталлаа. Дэлхийн аварга Ноа Лайлс Парисын олимпийн эрэгтэйчүүдийн 100 метрийн уралдаанд 0.005 секундээр илүүрхэж, алтан медалийн эзэн болов. Ямайкийн Кишане Томпсон түүнтэй яг дөрөө харшуулан барианы зурваст орж ирсэн бөгөөд нарийвчилсан, өндөр нягтрашилтай гэрэл зурагны тусламжтай Ноа Лайлс 0.005 секундын урд байж, алтан медаль хүртжээ. Харин хүрэл медалийг өөр нэгэн америк гүйгч болох Фред Керли авсан аж.

Ноа Лайлс 9.784 секундэд бариандаа орсон бол Кишане Томпсон 9.789 секунд, Фред Керли 9.81 секунд тус тус байжээ.

Ийнхүү АНУ 20 жил хүлээсэн эрэгтэйчүүдийн 100 метрийн алтан медалиа авлаа. Усайн Болтын эрин үед тэд дарагдаж, алтан медалийн бараа харж чадаагүй. Хамгийн сүүлд 20 жилийн өмнө 2004 оны Афины олимпоор Жастин Гэтлин түрүүлсэн түүхтэй.

Стаде де Франц цэнгэлдэхэд 80 мянган хүн тэдний уралдааныг үзэн сонирхжээ. Алтан медаль хүртсэн Ноа Лайлс "Би жижиг нэг тэмцээнд түрүүлсэнгүй. Хамгийн том тайзнаа хамгийн хэцүү дарамтан дунд шилдгийн шилдгүүдийн эсрэг би түрүүллээ. Уралдаж байгаа нэрсийг харахад л бурхан минь гэж уулга алдмаар байлаа" гэжээ.

Ноа Лайлс дахин алтан медаль хүртэх боломжтой. Тэрбээр одоо 200 метр, 4х100 метр, 4х400 метр гэсэн гурван төрөлд уралдана. Тэрбээр энэ талаараа "Би ялах болно. Тэдний хэн нь ч намайг дийлэхгүй. Миний ээлж ирэхэд тэд сэтгэлээр унах болно" гэв.